Royal Greenland taarsiiffigitinnissamik noqqaassuteqarnianngilaq
Royal Greenland nipisat suaannik Romark Seafoodimit piginerarneqartunik tulaassuisimaneragaalluni pasillerneqarneranik suliamut tunngatillugu taarsiiffigineqarnissamik noqqaassuteqarniarnani aalajangerpoq.
Poliit unnerluussisuisa Royal Greenland ullumi nalunaarfigaat, nipisat suaannik Romark Seafoodimit piginerarneqartunik Royal Greenlandip tulaassuisimanerarneqarneranik pasilliilluni suliaq unitsinneqartoq.
Politiit unnerluussisui allapput, pinerluttuliortoqarsimaneratut taassallugu naammattumik tunngavissaqartoqannginnera aalajangernermi tunngavigineqartoq. Unnerluussisut ilisimatitsissutigaattaaq, Royal Greenland taarsiiffigitinnissamik arlaatigut noqqaassuteqarsinnaasoq.
- Royal Greenlandimit tupaallaatigaarput assartuisup suliffeqarfiullu akornanni nalinginnaasumik isumaqatigiissuteqarneq akuusut ilaannut kingunerlussimammat. Suliami pineqartumi eqqunngitsuliornissaq suliffeqarfiup soqutigisarisimanngilaa, maannalu tamanna misissuisimanerup inernerata uppernarsivaa. Ilimagisimasarput maanna inerniliunneqarpoq, taamaammat Royal Greenland taarsiiffigitinnissamik noqqaassuteqarnianngilaq, naak politiit ammaassigaluartut, Káte Hansen Royal Greenlandimi Attaveqatigiinnermi Ingerlatsisoq oqarpoq.
Asseq
