Pisisartut Kalaallit Nunaanni aalisartoqarneq tupaallaatigaat
Royal Greenlandip tuniniaanermik immikkoortortaqarfianeersut sapaatip akunnerani kingullermi Bruxellesimiipput, tassani nunarsuarmi imarmiunik nerisassianik nittarsaassinerit annersaanni European Seafood Expositionimi peqataallutik.
Kalaallit Nunaata aalisakkanik nioqqutissiornera taama suliffissuaqarnikkut sunnigaanngitsiginera pisisartut tupigusutigiuarpaat. Royal Greenlandip immikkooruteqarnera nittarsaanneqarpoq, tassalu suliffeqarfiup tunisassiarisartagaani aalisakkat imarmiullu qaleruallit pitsaassusiat kisimik pineqanngimmata, kisiannili aamma nuna – inuiaqatigiillumi tamarmiusut – aalisarnermik aallaaveqartumik immikkuullarissumik tunngaveqarmata. Kalaallit Nunaat pinngortitamut minguitsumut aamma qangaaniilli piniariaatsinut amerlanernit tunngatinneqartartoq.
Bruxellesimi nittarsaassineq aalisakkanik nioqqutissiortartut naapitsisarfiisa nuimanersaraat, piffissamilu sivikinnerpaami isumaqatigiissutit amerlanerpaat tassani pitsaanerpaamik isumaqatigiissutigineqartarput. Nittarsaassinermi ilutigalugu Royal Greenlandip pisiniartartuisa pilersuisunik naapitsinissaannut periarfissiivoq nioqqutissiassallu aamma akussaannik akinik pitsaanerpaanik pissarsiffiulluni.
Nittarsaassinermissaaq Royal Greenlandip nioqqutissiaasa nutaat ilaat Royal Nuggets unammisitsinermut akimasuumut Prix d’Elite-mut innersuunneqarpoq, ajugaatinneqaranili.
- Ajugaanissaq immini anguniagaanngilaq. Anguniagaraarput mamartunik tunisaalluartunillu nioqqutissiornissaq. Nioqqutissiaq nittarsaassinnaagutsigu soorlu assersuutigalugu innersuunneqarnertut imaluunniit akissarsisinneqarnertut, taava tamanna ilapittuutitut pissarsiassaavoq, suliffissuarmi avammut nittarsaassinermut ingerlatsisoq, Hanne Kvist, oqarpoq.
Asseq
