Nunatsinni tunisassiat tunineqartartut marloriaatinngorput
2007-imiilli nunatsinni tunisassianit isertitat marloriaatinngorsimapput. 2007-imi iluanaarutaasut 5 mio. kr.-usimapput 2008-milu 10 mio. kr.-ngajaasimallutik. 2012-imi septembarip qaammataani akit 10 %-imik apparneqaqqipput. Tassa imaappoq, 12 mio. kr.-ngajannik nalillit ukioq manna tunineqarsimallutik.
Royal Greenlandip nunatsinni tunisassiaatiminik tunisisarnera ukiuni kingullerni ineriartorsimavoq. Nioqqutissiassanngorlugit sulianik aamma ilivitsunik aalisakkanik tunisinermi Royal Greenlandip isertitai 2007-imi 5 mio. kr.-t missaanniipput. Aappaaguani 2008-mi tunisat marloriaatinngorsimapput, matumani 9,8 mio.kr.-nik nalillit tunineqarsimallutik.
Ukioq manna tassa 2012-imi isertitat amerleriaqqissimapput, matumani 12 mio. kr.-ngajannik nalillit tunineqarsimallutik. Niuertarfinni kalaalimerngit akikinnerunissaannik inuit kissaateqarnerat eqquutsikkumallugu 2012-imi septembarip qaammataani Royal Greenlandip akit apparpai. Tunisinermi Royal Greenlandip amerlasuunngorlugit akigitittagai 10 %-imik apparneqarput, tamannalu ilutigalugu niuertarfinni akigitinneqartut 10 %-imik aamma apparneqarlutik. Akinillu appaanerup kingunerisaanik inuit pisinissaminnik kajumissuseqarnerulersimapput.
Ingo Hansen tuniniaasutut Royal Greenlandimit 2008-mi atorfinitsinneqarpoq. Ingo Hansen Royal Greenlandip qullersaqarfianut Nuummiittumut atassuteqarpoq. Aalisakkat tunisassiarineqartartut Royal Greenlandip tunisassiorfiini nioqqutissiassanngorlugit suliarineqartarput, suliffeqarfissuullu pigisaanit kilisaatinit aalisartunillu aalisakkat pisarineqartarput. Aalisakkat ilivitsuutillugit nioqqutissiassanngorlugilluunniit soorlu uulliaralugit, siatassanngorlugit, saaneqanngitsut amiiganngorlugit, issimit imaluunniit maskinanit panertitat, kingulliit pineqartut aqilisaganngorlugit tunineqartarput. Kapisillit, qeeqqat, eqaluit, saarulliit, qalerallit, kissavaasat, raajat saattuallu tunisassiarineqartarput.
Tuniniaanermi immikkoortortami cateringservicemik, tassa igaffinnut nerisassanik aatsisartussamik, matumani nerisassanik kommunemut kommunellu suliffeqarfiutaanut, ilinniarfinnut hotelinullu neqerooruteqarumaartartussamik pilersitsisoqarnissaanut Royal Greenland maanna pilersaarpoq.
Allattoq: Bula Larsen, bula@royalgreenland.com
Assiliisoq: John David Eriksen, jder@royalgreenland.com
Asseq
