Maniitsumi tunisassiorfik maanna allagartalerpoq
Maniitsumi tunisassiorfik Royal Greenlandimit pisiarineqaqqammersoq maanna suliffissuarmut ilisarnaatilerneqarpoq.
Tunisassiorfiup Arctic Green Foodip tunisassioriaasia ingerlatiinnarpaa. Maannakkut saarulliit niaquiakkat qeritiinnarlugit tunisassiarineqarput, taakkulu saniatigut saattuanik tunisassiortoqarluni. Maanna 25-nik sulisoqarpoq.
Maniitsumi tunisassiorfik Arctic Green Foodip tunisassiorfiutaasa Greenland Propertiesimit maanna Royal Greenlandimut tunisat quliusut ilagaat.
Maniitsumi tunisassiorfik Kalaallit Nunaanni saarullinnik tunisassiorfiit siullersaraat, ukiunilu 1949-50-ikkunni sanaajulluni. Kingorna ukiut ingerlanerini arlaleriarluni allineqarsimavoq.
Arctic Green Foodip oqaluttuassartaa: Siullerpaamik 1774-imi KGH aallarnerneqarpoq. 1985-imi KGH Namminersornerullutik Oqartussanit tiguneqarpoq PROEKS-ip ataaniitsilerlugu, kingorna Royal Greenland A/S-ip ataani, taava Nuka A/S-ip ataaneeriarluni KNI A/S-ip ataaniilluni. 2007-imi Arctic Green Food piginneqatigiiffinngorpoq namminersortoq nunap iluani tunisassanik tunisassiortoq, Maniitsullu tunisassiorfia taassuma ataaniilerpoq 2010-mi.
Allattoq: Bula Larsen
Asseq
