Paamiuni aasaanerani aalisakkerisut
Aasaanerani aalisakkeriartortut 24-t maanna tikissimalerput, Paamiullu tunisassiorfiani sulillutik. Marluk tulaassuinermi tigooraasuupput sinnerilu tunisassiorfimmi sulillutik.
Tunisassiorfimmi saarulliit angissusaat immikkoortiterpaat tisallugit saaneeraajarlugillu. Tunisassiorfimmi ingerlatsisoq Pele Nathansenip naatsorsuutigaa aasaanerani aalisakkerisut 20. Septembarip 2013 tungaanut sulisinneqarsinnaasut. Aalisakkeriartortut sumiiffinniiit ukunannga aggersuupput: Narsaq, Qaqortoq, Nanortalik nunaqarfinnillu Narsamijit, Alluitsup Paa aamma Tasiusaq.
- Nuannareqaara taama aalisakkeralunga aningaasarsiorsinnaagama, naatsorsuutigaaralu tunisassiorfimmi septembarip tungaanut sulissallunga. Aappaagu taamatut periarfissiisoqaqqippat suliartoqqikkusuppunga. Aalisarnermut ikiortitut ilinniarnikuuvunga ukiullu arfinillit avataasiorlunga aalisartuusimallunga. Maanna ukiorpaaluit suliffissaaleqisimavunga, Tasiusap mikinera pissutigalugu suliffissaaleqisoqarmat, oqaluttuarpoq 48-nik ukioqangajalersoq Aqqaluk Semsen, Tasiusarmiu.
- Qujamasoqaanga taama aalisakkerinissannut periarfissinneqarsimagama. Siusinnerusukkut Qaqortup tunisassiorfikuani aalisakkerisarsimavunga 13-21-nik ukioqarlunga. Kingullermik hjemmeplejeritut ikiortitullu sulisimavunga. Ukiorli kingulleq suliffeeruppunga. Royal Greenland aasaanerani aalisakkerisussarsiortoq suliffissarsiuussisarfimmut naqitsiartorlunga takugakku oqarfigaakka soqutigalugu. Kisimiittuuvunga marlunnik 14 aamma 23-nik ukiulinnik erneqarlunga, taamaattumik aningaasarsiulaarnissaq iluatinnarpoq. Aappaagu Qaqortumi suliffittaarsimanngikkuma aalisakkeriartoqqinnissaq soqutigisinnaavara, 43-nik ukiulik Marianne Benjaminsen, Qaqortumeersoq oqaluttuarpoq.
Allattoq:Bula Larsen
Asseq
