Marsip 25-ani nipisat suaannik tunisisinnaanngortoqassaaq
Inuussutissarsiutigalugu aalisartut marsip naanerata missaaniit juunip naanerata imaluunniit juulip aallartilaarnerata tungaanut nipisat suaannik tunisisarput.
Royal Greenlandip Nuummi, Qeqertarsuatsiaani Narsamilu tunisassiorfiinut tunitsiviinullu tunisisarneq marsip 25-ani aallartissaaq. Paamiuni, Atammimmi Kangaamiunilu tunisisarneq apriilip aappaani aallartissaaq. Royal Greenlandip tunisassiorfiinut tunitsiviinullu nipisat suaannik tunisisarneq qaammatit pingasut missaanni sivisussuseqartarpoq.
Nipisaat avannarparternerat ilutigalugu Avannaani tunisisarneq apriilip qiteqqunnerani aallartissaaq. Ilulissani, Qeqertarsuarni, Qasigiannguani, Kangaatsiami, Ikerasaarsummi, Niaqornaarsummi Qaarsunnilu tunisassiorfiit tunitsiviillu nipisaat suaannik tuniniaavigineqartarput.
- Suaat tunineqareeraangamik salinneqareeraangamillu imermi tarajulikkami asiunaveersaatilikkamilu sapaatip akunnera ataatsimik sivisussusilimmik uninngatinneqartarput. Kingorna suaat nappartanut ikineqartarput suannillu tunisassiorfiusumut Cuxhavenimut Tysklandimiittumut nassiunneqartarlutik. Tassanngaanniillu Europami pisisartunut tuniniarneqaqqittarput, Møller Lyberth Royal Greenlandimi tunisassiorfinnik ingerlatsinermi ingerlatsisoq oqarpoq.
Allattoq: Bula Larsen
Asseq
