Saarullinnik uumasunik misileraalluni aalisarneq
Royal Greenland `saarulliit akunnittarfiinut´ assartugassanik saarullinnik uumasunik bundgarniniit milluaasarluni misileraalluni aalisaleruttorpoq. Saarulliit pisat uumasut Maniitsumi tunisassiorfimmut assartorneqartarput, tassanilu akunnerit arlaqanngitsut ingerlaneranni tunisassiarineqartarput. Aalisakkanik tunisassiat taamaasillutik pitsaalluinnartuusarput.
Saarullinnik uumasunik misileraalluni aalisarneq juuli-aggusti 2014-imi ingerlanneqassaaq, aalisartullu Maniitsumeersut Maniitsup eqqaani aalisartut saarullinnik uumasunik pilersuisuupput.
- Saarullinnik uumasunik aalisarneq juulimili ingerlapparput. ´Saarulliit akunnittarfii´ uummatitsiviupput immamiitinneqartartut, aalisariutillu Leap saarulliit uumasut fire tonsikkaarlugit uummatitsivinniit Maniitsup tunisassiorfianukaattarpai. Tunisassiorfimmulli apuunneqannginneranni toqunneqartarput aaviarneqartarlutillu, Sten Sørensen Royal Greenlandimi tunisassiorfinnik ingerlatsinermi ingerlatsisoq oqarpoq.
- Tamatuma kingorna saarulliit nutaarluinnaat issunnginneranni Maniitsumi tunisassiorfimmi salinneqartarput, qupineqartarput, saaneeraajarneqartarput poortorneqartarlutillu. Nioqqutissat naammasseriikkaat taamaasillutik pitsaalluinnartuusarput.
- Taava tunisassiat Aalborgimut nassiuteriarlugit Danmarkimi tuniniaanermi immikkoortortarput aqqutigalugu niuerfinnut Europamilu atuisunut ingerlateqqinneqartarput, Sten Sørensen Royal Greenlandimi tunisassiorfinnik ingerlatsinermi ingerlatsisoq oqarpoq.
- Saarullinnik uumasunik misileraalluni aalisarnerup ingerlarnga pillugu Royal Grrenlandip nalilersuinnginnermini Europami atuisartut saarullinnik tunisassiat pitsaassusaannik nalilersuinerat utaqqeqqaarusuppaat. Taamaasilluta paasissavarput misileraalluta aalisarnerput ingerlatiinnassaneripput. Tunisassialli pitsaangaarmata isumaqarpugut ingerlatiinnarumaaripput, Sten Sørensen naggasiivoq.
Royal Greenland saarullinnut uummatitsivinnik arfineq-marlunnik Norgeminngaanniit pisinikuuvoq. Taakkualu tukertitsivittut atugassiaapput. Angallat Drageberg saarullinnik uumasunik assartuutaasoq Savalimmiunit attartugaavoq, Lealu Royal Greenlandip nammineq angallatigalugu.
DTU-mi ilinniartup Elvar Traustasonip saarullinnik uumasunik misileraalluni aalisarneq pillugu soraarummeerutigalugu allaatigisaqarpoq, misileraallunilu aalisarnerup qaammatini marlunni ingerlanneqarnerani Royal Greenlandip taama misileraalluni aalisarneranut peqataalluni. Ole Petersen Royal Greenland sinnerlugu suliniutip ingerlanneqarnerani aqutsisuuvoq.
Allattoq: Bula Larsen
Asseq
