Qasigiannguit tunisassiorfiat IFS-imik allagartartaarpoq
Qasigiannguiani tunisassiorfik Royal Greenlandip aalisakkanik tunisassiorfiutaani siullersaalluni IFS-imik, International Food Standard, allagartartaarpoq.
Tunisassiorfiit allagartalerneqarnerannut apeqqutaasarpoq pisisartut tunisassianut suut piumasaqaatigineraat. Ingammik tuluit, franskit tyskillu niuerfiinit annertuumik kissaataavoq tunisassiat tunisassiorfinni pitsaassusermik uppernarsaatinik allagartalinnit tunisassiarineqarsimanissaat.
- Tyskit franskillu pisisartuisa kissaatigaat tunisassiorfiit IFS-imik allagartaqassasut, tuluilli pisisartuisa BRC-imik allagartaqarnissaat kissaatigalugu. Pisisartut qulakkeerusuttarpaat tunisassiat pisiarisartakkamik pitsaalluinnartuunissaat, pitsaassuseqarluartumillu tunisassiarineqarsimanissaat. Tamanna isumaqarpoq tunisassiorfiit piumasaqaatit qaffasinnerusut naammassiumallugit suliaqarluarnerusariaqassasut, Nauja Heiselberg, Royal Greenlandip Kalaallit Nunaanni pitsaassusiliinermi ningiuusoq oqarpoq.
- Allagartalerneqarneq Qasigiannguani tunisassiorfimmi sulisut ulluinnarni amerlanerusunik nakkutilliinernik ingerlatsisariaqalernerannik kinguneqassaaq. Taamaaliortoqartassaarlu immamit amuneqarneraniit pisisartunut apuunneranut inuussutissat pitsaassusaat qulakkeerumallugu. Qasigiannguit IFS-imik marts 2014 allagartartaarput, tunngaviusumik Foundation Level tassa allagartat appasinnerpaaffiat, neriuppugullu ukiamut imaluunniit aappaagu qaffasinnerpaaq High Level pissarsiariumaarlutigu.
- Neriuppugut taama allagartaqalernitsigut amerlanerusunik pisisartoqalerumaarluta. Pisisartut naatsorsuutigisinnaavaat tunisassiorneq ajunngitsumik ingerlammat aamma toqqissisimassutigisinnaavaat tunisassiani pitsaassuseq ajunngilluinnartuusoq.
- Nuanneqaaq taama sullaritsigisunik suleqateqaratta pitsaassusermik taamaattumik angusaqarsinnaasunik. Soorunami anguniarnera imaannaasimanngilaq, aammali pitsaassutsip taamaattuaannarnissaata sulissutiginissaa imaannaassanngilaq. Sulisunut nersualaarinnissutaavoq, Nauja Heiselberg naggasiivoq.
Sisimiuni Ilulissanilu tunisassiorfiit raajanut BRC-imik allagartaqareerput (British Retail Consortium) qaffasinnerpaamik Grade A-jusumik.
Allattoq:bula@royalgreenland.com
Asseq
