AWG2016-imut tapiissuteqarnermik isumaqatigiinneq

AWG2016-imi pisortap Maliina Abelsenip pisortaanerullu Mikael Thinghuusip isumaqatigiissut ullumikkut atsiorpaat.

Royal Greenlandip tapiissuteqarnermik Nanoq-mik taasaq aqqutigalugu 1 million kr-t sinnerlugit nalilimmik isumaqatigiissuteqarnermigut tamatigoortumik imminut pisussaaffilerpoq. Isumaqatigiissut naapertorlugu aningaasatigut, tunisassiatigut AWG2016-ip ingerlanneqarnerani nerisitsinissani, ilasseqatigiinnissani nerersuarnissanilu atugassanik aammalu piumassutsimik sulisussatigut, pikkorissarnertigut allatigullu tapiissuteqartoqassaaq.

- Inuiaqatigiinni akisussaaqataanerput naapertorlugu AWG2016-ip aallartinngilaattaani, ingerlanneqarnerani naammassereerneqarneranilu tapersersuinissarput pissusisamisoortiinnarparput. Soqutiginartorsiatut taasinnaavarput aalisakkanik panertunik peqqinnartutut tamulugassianik AWG2016-imi peqataasussanut immikkut naatsorsuussanik tunisassiorniaratta. Aamma inuusuttut 30-t missaanniittut Kalaallit Nunaannit tamaneersut pikkorissarnissaannut taamalu unammiuaarnerit ingerlanneqarneranni suleqataanissaannut kingornalu iluaqutigiumaagaannut annertungaatsiartumik aningaasaliissuteqarniarpugut, Royal Greenlandimi pisortaaneq Mikael Thinghuus oqarpoq.

- Immikkut nuannaarutigaarput Royal Greenlandi inuusuttunut suliniutissatsinnut aallarnisaaqataarusummat. Tamatumani Kalaallit Nunaaniittut tamakkerlugit AWG2016-imi akuutinniarneqarput, taamaasiornitsigullu pilersaarummik taama annertutigisumik aaqqissuussisutut pissarsiaqaatigisinnaasaa iluatsinniarsinnaavarput. Aningaasat taakku atorlugit inuusuttut nunatsinnit tamaneersut katersuutsinnerisigut nunatsinnut sinniisutut qulakkeersinnaavagut, AWG2016-imi pisortaq Maliina Abelsen oqarpoq.

Isumaqatigiissut atsioqatigiinnermiit AWG-mi unammiuaarnerit 2016-imi marsimi naammassinissaasa tungaannut atuutissaaq.

Asseq