Tunisassiorfinni sulisut 150-it missaat pikkorissartut
Ilulissani tunisassiorfimmi sulisut 76-it, Qasigiannguanilu 75-80-it ´Suleqatigiinneq pitsaasoq´ aamma ´Ileqqut pitsaasut arfineq-marluk´ februar-marts 2014-imi pikkorissarfigissavaat.
Raajarniutit Qeqertarsuup Tunuani sikuerunnissaa, taamatullu kilisaqqilernissartik aamma ilaatigut Royal Greenlandip tunisassiorfianut Ilulissaniittumut tunisisaleqqinnissartik maanna utaqqivaat. Taaneqassaarli qaleralinniarneq suli ingerlammat, qaleralinnillu qerititerineq Royal Greenlandip Ilulissani tunisassiorfiani ingerlaannarmat, aammalu Qasigiannguit tunisassiorfianut tunisassiassanik pilersuineq ingerlaannarluni.
- Raajalerisut angerlartiinnarneqartussaagaluit maanna piffissaq atorluarpaat. Qalerallerisut peqatigalugit maanna pikkorissartinneqarput pikkorissaanermi ´Suleqatigiinneq pitsaasoq´, tassani pikkorissarfigalugit: Suliffeqarfiup anguniagaa (tunisassiorfiup taamatullu ingerlatseqatigiiffiup), attaveqatigiinneq aammalu sulisut aqutsisullu akornanni akerleriitttarnernik pinngitsoortitsiniaanerit, CSR aamma meeqqat pisinnaatitaaffii, Esther Arens, sulisoqarnermi siunnersorti oqarpoq.
Taanna naammassereerunikku kingorna ´Ileqqut pitsaasut arfineq-marluk´ pikkorissarfigissavaat.
- Ilulissani tunisassiorfimmi aqutsisunut naleqqussagaq ´Ileqqut pitsaasut arfineq-marluk´ pikkorissaavigeqqammerpara, Estherlu pikkorissaanerminik naammassippat sulisunut taanna pikkorissaatigissavara, Ado Egede, sulisoqarnermi siunnersorti oqarpoq.
Esther Arensip holdt pingasut ullut marlukkaarlugit sap.ak. 9-mi pikkorissassavai, kingornalu Qasigianngualiassaaq tunisassiorfimmi taamatut pikkorissaajartorluni. Taamaalilluni Ilulissani Qasigiannguanilu 25. februarimit - 7. marts tungaanut pikkorissartoqassaaq, Royal Greenland Academy paasissutissiivoq.
Allattoq: bula@royalgreenland.com
Asseq
