Qassimiuni tunitsivik tunineqarpoq
Qassimiuni tunitsivik Kim Høegh-Damimut tunineqarpoq, piginnittuatalu akisussaaffigilereerpaa.
Qassimiuni tunitsiviup Royal Greenlandip Arctic Green Foodimit pisiarisimasaata tunineqarnera ullumi marlunngornermi juulip 1-ani atsiorneqarpoq, tunitsivillu piginnittuanut nutaamut Kim Høegh-Damimut tunniunneqareerpoq.
Tunitsivimmut kingullermik tunisisoqarpoq 2011-mi imaluunniit 2012-imi, taamani nerpiit tarajortikkat, nipisat aammalu nipisat suaat tunisassiarineqarput. Tunitsivimmi ulapaarfiup nalaani qulingiluat tungaannut sulisoqarsinnaasarpoq.
Tunitsivik 2009-mi nutaanik qerititsivittaarpoq. Tunitsivillu atorsinnaalissappat arlalitsigut nutarsaavigineqartariaqarpoq.
Qassimiut Kommune Kujallermut atavoq Qaqortup eqqaaniilluni. Nunaqarfimmi innuttaasut 2011-mi 25-usimapput.
Allattoq: Káte Hansen, kaha@royalgreenland.com
Asseq: RG
Asseq
