Ineriartuinermik suliniut 60.000 koruuninik taperneqartoq
Avatangiisinut Pinngortitamullu Naalakkersuisoqarfiup Royal Greenlandip VEK-mut aningaasaliissutinut qinnuteqaataa akuersaarpaa 60.000 koruuninillu tapiilluni. VEK-imut aningaasaliissutit Nukissiuutit ataavartut, Nukimmik atorluaanissamut pitsanngorsaanerit aamma silap pissusaanut tunngasut tapertarpai.
Tapiissutit Sisimiuni saattualeriffiup qulliisa nalinginnaasut qullernik LED-inik taarsersorneqarnissaanut atorneqassapput, taamaalilluni tunisassiorfimmi nukimmik atorluaalersitsinerulersinnaaneq anguniarneqassammat.
Naalakkersuisut Royal Greenlandip Sisimiuni saattualerivianut ukiaru ammaqqittussamut 60.000 koruuninik tapiipput.
Taamaattoqarneratigut Sisimiuni saattualerivimmi qulliit nalinginnaasut qullernik LED-usunik taarserneqassapput. Qulliit taamaattut suli Royal Greenlandip tunisassiorfiini atorneqanngillat.
Qullernik LED-inik atuilernissamik kissaateqarnermut pissutaavoq kWh-imik nukimmik ukiumut atuineq qullermut ataatsimut marloriaatingajammik annikillisinnaammat (550,02 kWh-mit 284,7 kWh-mut). Aammattaaq qulliit LED-it sivisunerusumik atorneqartarput, piffissallu ingerlanerani ikinnerusunik aningaasartuutissartaqarlutik.
- Qulliit LED-it qaamanikinnerupput nalinginnaasunik qullerniit, taamaammat saattuanik tunisassiorfimmi qullernik LED-inik atuilernissaq misileraanerussaaq, inuussutissanik qaffasissumik pitsaassusilinnik inimi tunisassiorfiusumi naammattumik qaammaqqutaasinnaanersoq paasiniarlugu, Søren H. Nielsen, Sisimiuni tunisassiorfimmi teknikkeqarnermi immikkoortortaqarfimmi suliniutinik aqutsisoq oqarpoq.
- Misileraaneq iluatsippat Royal Greenlandip tunisassiorfippassuinut tunitsiviinullu qullernik LED-inik atuinerup siaruaannissaa periarfissaqarluassaaq.
Royal Greenland aningaasaliiffigineqarnermut atatillugu qulliit LED-it tunisassiornermi atorneqalernerani iluarinartinneqarnersut, aammalu sulisut illorrisimaarnerulerneranik kinguneqarnersut pillugit Naalakkersuisunut nalunaaruteqarumaarpoq.
Allattoq:bula@royalgreenland.com
Asseq
