Kangaatsiami imeq qalaqquneraluartoq tunisassiorput
Kangaatsiami imeq bakteriaqapallaalersimasoq sapaatip akunnerani kingullermi paasineqarpoq, innuttaasullu erngup atunnginnerani qalaqqaarneqassasoq Namminersorlutik Oqartussanit innersuussutigineqarpoq. Tamaattorli tunisassiorfimmi saarullinnik nerpiliorneq ingerlatiinnarneqarpoq
- Imermik misissugassamik Nuummi laboratoriat qullersaqarfiannut nassiussivugut, ullunilu qaninnerni inernerusut paasisaqarfigissallugit. Aamma nerpinnik laboratoriat qullersaqarfiannut nassiusiumaarpugut, Kangaatsiami tunisassiorfimmi ingerlatsisoq Abia Thorsteinsen taama oqarpoq.
Royal Greenlandip pitsaassusilerinermi immikkoortortaqarfimmi misissuinerit ingerlanneqarput Danmarkimilu Inuussutissat pillugit aqutsisoqarfik suleqatigineqarluni.
Aavarneq aallarteqqammermat aalisartut aavariartut amerlapput, taamaattumillu ulluni makkunani tunisassiorfmmi saarullinnik tunisassiassaqarpallaanngilaq.
Allattoq: Nathan Kreutzmann, nakr@royalgreenland.com
Asseq: RG
Asseq
