Ukkusissani imissaaleqineq kinguneqassaaq
Ukkusissani imissaaleqineq pissutigalugu Royal Greenlandip tunisassiorfiani qalerallit ilivitsuutillugit qerinasuartittalerpaat. Imissaaleqineq tunisassiorfimmi sulisunik suliunnaarsitsigallarnermik aamma kinguneqassaaq
- Tunisassiornitsinni imeq annertooq atorneqartarpoq qalerallit niaquiarlugit paperuiarlugillu tunisassiarisaratsigik. Taamatut tunisassiorneq imermik atuinartorujussuummat Nukissiorfiinniit imermik atuinerput annertuallaartoq ilisimatinneqarpugut. Taamaattumik qalerallit ilivitsuutillugit qerinarsuartittalerpavut, Ukkusissani Royal Greenlandip tunisassiorfiani ingerlatsisoq Johanne Knudsen Samuelsen oqarpoq.
Ukkusissani tunisassiorfimmi sulisut maanna 14-it sulisorineqarput, imissaaleqinerli pissutigalugu ikilisaasariaqalernissaq avaqqunneqarsinnaassanngitsoq tunisassiorfimmi ingerlatsisoq oqarpoq.
- Qalerallit ilivitsuutillugit qerinasuartikkaangatsigit sukkanarnerusarpoq suliassakinnarnerullunilu. Tunisassiat suliarinagit tunisassiarineqartalernerisa kingunerisaanik sulisut sisamat januarimi februaarimiluunniit suliunnaarallarsittariaqalissavavut, Johanne Knudsen Samuelsen oqarpoq.
Aalisartunut sunniuteqanngitsoq
Ukkusissani aalisartut ukioq kaajallallugu qaleralinnik tunisisinnaasarput. Imissaaleqisoqaraluartorli aalisartut tunisisarnerat sunnerneqassanngilaq.
- Qaleralinnik tunisisinnaaneq unitsinneqanngilaq. Aalisarfiusartut maanna sikoreerput, aalisarfiulluarlutillu. Tunisassiassanik amigaateqanngilagut, qerinasuartitsivigullu inissaqarluarmata ulikkaarnissaat ernumananngilaq, Johanne Knudsen Samulesen oqarpoq.
Allattoq: Nathan Kreutzmann, nakr@royalgreenland.com
Asseq: Johanne Knudsen Samuelsen
Asseq
