Pisanik qamuteralannik assartuisinnaaneq akuerineqarpoq
Ilulissat kangiani qimussimik sikumi aalisartut pisaannik qamuteralannik Royal Greenlandip tunisassiorfianut assartuisinnaaneq Qaasuitsup Kommuniata akuersissutigaa
Qamuteralaat Ilulissat kangiani sikukkut ingerlaaqqusaanngimmata aalisartut qimussersut sikumi pisaat qamuteralaat nunakkut ingerlaarlutik Royal Greenlandip tunisassiorfianut oqquttassavaat.
Ilulissani Sinerissap Qanittuani Aalisartut Piniartullu Kattuffiata SQAPK-ip, Ilulissani qamuteralattartut aammalu Ilulissani Royal Greenlandip suleqatigiinnerisigut aaqqissuussineq piviusunnngorpoq.
Qamuteralaat nunakkut aalajangersimasukkut ingerlaarfeqarlutik aammalu nunakkuinnaq ingerlaarlutik assartuisarnissaannik piumasaqaateqarnikkut kangerlummi nunarsuarmi kingornussassat pillugit UNESCO-p allattugaataaniittup timaatigut qamuteralaat ingerlaarsinnaanerat akuerineqarpoq.
- Akuersissut taamatullu periarfissaq nutaaq qimusserlutik sikumi aalisartut ukiuunerani sivisunerusumik aalisarsinnaanerannik annertunerusumillu pisaqarsinnaanerannik periarfissiivoq, Ilulissani SQAPK-mi siulittaasoq Hans Lars Siegstad oqarpoq.
Assartuineq
Suleqatigiilluni aaqqissussuussineq aaqqissuunneqarpoq Ilulissat kangiani 70 kilumiiterinik ilorpasitsigisumi qimusserlutik sikumi aalisartut kilumiiterit tallimat 20-illu isorartussuseqartumi pisatik nunamut assartortassagaat. Pisat paaliarsuarnut 250 kiilut tikillugu imaqarsinnaasunut issoraanneqartassapput, taakkulu paaliarsuit atilersorneqarsimallutillu nalunaaqutsersukkat 50-kilumiiterit missaannik isorartussusilik ingerlaarfigalugu qamuteralannik assartorlugit Royal Greenlandip tunisassiorfianut apuuneqartassapput.
Aaqqissuussinerup alaffissorluni suliassartai, tassalu paaliarsuit atilersorlugit nalunaaqutserneqarneri aammalu qamuteralannik ingerlatsisut aalisartut tunisinermikkut akissarsiassaat ilanngassiffiginerisigut akilerneqartarnissaat Royal Greenlandip suliariumallugu neqeroorutigaa.
- Aalisartut peqatigiiffimmut sorlermulluunniit ilaasortanut periarfissaq atorneqarsinnaavoq. Neriuutigaarput aaqqissuussineq aalisartut amerlanerusut qimusserlutik aalisartaqqilernissaannik nassataqassasoq, Hans Lars Siegstad oqarpoq.
Sapaat februaarip ulluisa 22-iat qalerallit tons ataatsip missaaniittut assartorneqarlutik Royal Greenlandip tunisassiorfianut tunineqarput.
- Akuersissutaagallartoq februaarip ulluisa 28-iata tungaanut atuuppoq, kisianni neriuutigaarput ukiut tamaasa nutarterneqartartussamik ataavartumik akuersissumik tunineqarumaarluta, Hans Lars Siegstad naggasiivoq.
Allattoq: Inga Egede, ineg@royalgreenland.com
Asseq: Therkel Mathiassen
Asseq
