Qasigiannguit tunisassiorsinnarpoq
Qeqertarsuup Tunuani sikunera pissutigalugu tunisassiorfinnut tunioraaneq unikkallarnikuuvoq, kisiannili Qasigiannguani qaleralinnik qerisunik suliareqqitassanik naammattunik peqarmat Qasiginannguani tunisassiorfimmi apriilip naanerata tungaanut qaleraliit nerpiinik qeriteqqitanik tunisassiorsinnaapput. Taamaattumik Qasigiannguani tunisassiorfimmi sulisunik suliunnaarallartitsisoqassanngilaq.
- Tunisassiorfimmut tunisisoqarsinnaanngikkallarnerani qaleraliit qeriteqqitat nerpii tunisassiassanngorlugit suliaraavut, tunisassiorfiup ingerlatsisua Frank Hagen oqarpoq.
- Tassa imaappoq apriili naatinnagu sikuissappat, taava tunisassiorfimmi sulisunik suliunnaarallartitsisoqassanngilaq. Maannamut sulisut paarlagaallutik sulisut 150-it apriilip naanerata tungaanut suliassaqartissinnaallugit nioqqutissiassanik peqarpugut.
Qaleralillit qerisut aatseriarlugit nerpii piiarlugit kingornalu poortoriarlugit qeriteqqillugit tunisariaannanngorlugit suliareqqinneqartarput, Frank Hagen nassuiaavoq.
- Kilisaatip Tuugaaliup novemberimi decemberimilu qaleralinnik 800 tonsinik pilersorpaatigut. Tassalu taakku maanna nioqqutissiassatut suliareqqippavut.
Qasigiannguani tunisassiorfik aalisariutinit, umiatsiaararsortunit aammalu Royal Greenlandip kilisaataataannit tunisassiassanik nalinginnaasumik pilersorneqartartup qalerallit 2.000 tonsit qeritissinnaavai.
- Ajoraluartumik nioqqutissiassat januarimi assartugassat sikunera pissutigalugu Royal Arctic Linep apuutinngitsoorpai. Kisiannili qaleralinnik 470 tonsinik qerititsivimmiititaqarpugut. Taakku peqqumaasiviimmititat atorlugit apriilip naanissaata tungaanut sulisut 150-iusut suliassaqartissinnaavagut, Frank Hagen oqarpoq.
Allattoq: Inga Egede, ineg@royalgreenland.com
Assit: Hagen Frank
Asseq
