Sikumi aalisarneq aamma issimit panertitsineq ingerlanneqarpoq

- Ikerasaarsuup eqqaa sikummat aalisartut sikumi aalisaramik tunisassiorfimmut tunioraapput. Taamaattumik nunaqarfimmi tunisassiorneq ingerlavoq, Kangaatsiami tunisassiorfimmi ingerlatsisoq Abia Thorsteinsen oqarpoq.

Abia Thorsteinsen aamma Kangaatsiap eqqaani nunaqarfinni tunisassiorfinnut akisussaasuusoq oqarpoq nunaqarfinni Niaqornaarsunni, Attumi aammalu Ikerasaarsummi saarullinnik tunisassiorneq ingerlasoq.

- Nunaqarfinni Attumi Niaqornaarsummilu suli sikunngilaq, taamaattumik aalisartut tunisassiorfinnut tunioraapput. Saarulliit tunineqartut ilaat tarajorterneqarput ilaallu issimit panertinneqarlutik.

Attumi saarulliit issimit panertitat nassiunneqassallutik poortorneqaleruttorput.

- Attumi suliassaqarluarput, saarulliit issimit panertitat tunisassiaraat. Maannakkorpiaq saarulliit issimit panertitat 1,5 tonsit paletsinut poortorlugit Nuummut nassiunnissaannut piareersarpaat. Saarulliit issimit panertitat Nuumminngaanniit sineriammi tunisassanngorlugit nassiussorneqassapput, Abia Thorsteinsen oqarpoq.

Kangaatsiami silap unerisimannginnera aammalu sikkorlunnera pissutigalugu decemberi naalersorli tunisassiorfimmi suliassaqarsimanngillat.

- Kangaatsiami silap unerisimannginnera aammalu sikkorlunnera pissutigalugu Kangaatsiami aalisartut aalisarsinnaasimanngillat. Tunisisoqarneq ajormat ajoraluartumik tunisassiorfimmi sulisut 15-it missaaniittut ukiortaamiilli suliassaqartissimanngilavut, Abia Thorstiensen oqarpoq.

Kangaatsiami qeritsitivik tunisassiassanik 100 tonsinik immerneqarsinnaavoq. Decemberip naanerani qerititsivik saarullinnik, qeeqqanik suluppaakkanillu ulikkaarnikoq imaarneqarpoq.

Allattoq: Inga Egede, ineg@royalgreenland.com

Asseq: RG

Asseq