Tunisinerup uninnganerani pikkorissarneq
Disko Bugtimi sikunera pissutigalugu Ilulissani tunisassiorfimmut raajanik tunisineq uninngavoq. Tunisinerup uninnerata kinguneraa, tunisassiorfimmi sulisut 30-t angerlartiinnarneqarnerat. Tunisassiorfimmili sulisut uninngaannanngillat, Royal Greenland Academy sulisunut angerlartitaanikunut pikkorissarnissamik aaqqissuussivoq. Sulisut 25-t sapaatip akunnera 6-imi pikkorissarput, tunisinerullu uninnganerani sulisut 50-it ”Ileqqunik allannguineq”-mik pikkorissarnermik neqeroorfigineqassapput.
- Disko Bugtip sikunerata kinguneraa januaarip 21-aniik raajanik tunisinerup uninnganera. Taamaammat tunisassiorfimmi sulisut 30-t angerlartiinnartariaqarsimavagut. Royal Greenland Academy-lu suleqatigiilluta suleqatitta pikkorissarnissaannik aaqqissuussipallappugut. Sapaatip akunnera 6-imi sulisut 25-t siulliit pikkorissarput. Tunisinerup ammaqqinnginnerani holdit allat marluk periarfissaqarput pikkorissarneq ”Ileqqunik allannguineq” naammassissallugu, taama oqarpoq tunisassiorfimmi ingerlatsisoq Hans Lars Olsen.
- Tunisassiorfimmi sulisut 25-t missaanniittut suliinnarput, Hans Lars Olsen oqarpoq.
- Tunisassiorluta ulapinnitsinni suliassat piffissaqarfigineq ajukkagut sulisusut suliinnartut suliaraat. Soorlu qalipaanerit, suliassallu allat maannakkut suliarineqartut. Qaleralinnik suli tunisaasunik sulisut 10-15-it suliaqarput.
Siku pissutaalluni tunisinerup unittarnera naliginnaasuusoq Hans Lars Olsen oqarpoq.
- Nunamiippugut siku pissutigalugu ukioq kaajallallugu raajanik aalisarfigisinnaanngisatsinni. Kisianni isumaqarpunga piffissat tunisinermi uninngaffiusut sivikinnerulersimasut. Qangaanerusoq tunisineq qaammatit sisamat tungaannut uninngasinnaasarpoq, ukiulli tallimat kingulliit sivisunerpaamik sapaatit akunneri sisamat tunisineq uninngasarpoq, Hans Lars Olsen oqarpoq.
Allattoq: Inga Egede, ineg@royalgreenland.com
Assit: RG
Asseq
