Uummannami sikunera suliffissanik pilersitsivoq
- Isserujussuarnerata nassatarisaanik Uummanami sikujaarnera ataavartumik tunisassiorsinnaanitsinnik nassataqarpoq. Aalisartut 25 tons pallillugit ullormut tunisisarmata suliassaqarluarpugut, taama oqarpoq Uummannami Royal Greenlandip tunisassiorfiani ingerlatsisoq Kirsten Nielsen Jensen.
Ummannami Royal Greenlandip tunisassiorfia annertunersusumik qaleralinnik saarullinnillu tunisassiorpoq. Qaleraliit niaquikkat paperuakkallu nerpii tunisassiarineqartarput aamma qalerallit mikinerumaat saarullillu iluitsuutillugit qerititerneqartarput.
Sikunngikkallarmat inuit 40-it missingi tunisassiorfimmmi sulisorineqarsimasut sikunerata kingorna sulisut marloriaatingajaat sulipput.
- Maannakkorpiaq katillugit inuit 74-it tunisassiorfimmi sulipput. Ullaakkoortoqarpoq ualikkoortoqarlunilu soorunalumi aamma sulisut allat soorlu eqqiaasut, allaffimmiut, laboratoriami sulisut allallumi sulipput.
- Qularnanngilluinnnarpoq tunisassiornitta annertusineratigut illoqarfimmi suliffissaaleqisut ikilisut. Taamaattumik tunisassiornitta annertusinera kommuunip aningaasaqarneranut aamma sunniuteqassaaq, Kirsten Nielsen Jensen oqarpoq, oqaatigalugulu taamaattoq aamma sulisussaqarniarneq ajornartorsiutaasoq.
- Sulisussanik ajornartorsiortarneq annertusiartuaaginnartutut isikkoqarpoq. Taamaakkaluartoq sapinngisamik naammattunik sulisoqarniarneq ingerlanniartarparput, aamma pisariaqartillugu sulisut oqaloqatigisaratsigit sulisup sulinerata pitsanngorneranik nassataqartarpoq, Kirsten Nielsen Jensen nassuiaavoq.
Uummannami januarimi inuit suliffissarsiorlutik saaffiginnittut 141-isut februaarip naanerani suliffissarsiortut nalunaarsoqqasut 35-iupput.
Allattoq: Inga Egede, ineg@royalgreenland
Assit: Kirsten Nielsen Jensen
Asseq
