Upernavimmi tunisassiorneq ingerlalluartoq
Royal Greenland A/S-ip Upernavimmi nunaqarfiinilu tunisassiorfiit tamarmik Upernavik Seafood A/S-imit 2014-imi oktobarip aallaqqaataani pisiarimmagilli Upernavimmi nunaqarfiinilu tunisassiornerit tamarmik ingerlallualerput. 2014-imi tunisassiat ukiup siuliani tunisassianut sanilliullugit 200 tonsinik annertusipput. Tunisassiorneq ingerlalluartoq 2015-imi ingerlalluaannassangatinneqarpoq. Tunisassiorfimmi ingerlatsisup ilimagaa tunisassiorfinni tamani tunisassiarineqartartut annertuseriassasut
- Upernavimmi nunaqarfiinilu tamani annerusumilli Nutaarmiuni, Tasiusami Innaarsunnilu tunisassiarineqartartut annertuseriasssasut ilimagaarput, nunaqarfiimmi taaneqartut eqqaat aalisarfissuummata, taakkualu najugaqartunit "kuulteqarfik"-mik taaneqartarput, Upernavimmi tunisassiorfimmi ingerlatsisoq Flemming Andersen oqarpoq nangillunilu:
- Taamatuttaaq aalisartut piffissaq tunisiffigisinnaasaat sivitsorneqartussaanera taamaalisukkullu pisassiissutit 1500 tonsinik annertusineqarnerat pissutigalugit ukioq manna tunisassiorluartoqassasoq ilimagilluinnarpara.
Upernavimmi nunaqarfiinilu tunisassiornerit ingerlalluarnerisa saniatigut Upernavimmi pigisaanilu tunitsivinnik qerititsivinnillu alliliisoqarnissaanut pilersaarusiortoqarpoq, tamannalu ilutigalugu Upernavik Seafood A/S-ip tunisassiorfiutigisimasai Royal Greenland A/S-ip pisiarisimammagit Flemming Andersenip naammagisimaarpaa.
- Tunisassiorfiit pisiareqqammernerisa kingorna ernumaqqaalaarsimavugut, tigunerili nuannersunik tamatsinnit misigisaqarfiupput. Aalisarneq tunisassiornerlu ineriartorluarpoq, Upernavimmilu pigisaanilu aalisarnerup ineriartortinneqarnissaanut pilersaarusiortoqareerpoq. Sulisut attavigissaarluarnerulersimapput, tamatumani paasissutisseeriaaseq siornatigumut sanilliullugu pitsaanerulersimalluni. Taamatuttaaq aalisartut tunisisinnaanerup sivitsorneqartussaanera Royal Greenlandimilu aalisarnermut siunnersortinut attassuteqarsinnaanertik pillugit naammagisimaarinnippasipput, Flemming Andersen oqarpoq.
Allaaserisaq tamaat Navigatio nr 2, 2015 -mi atuarsinnaavat: Uani
Asseq
