Akap qalipagaa uleerneqartoq
Aka Høeghip qalipagaa uleerneqarmat alutorinnippalaartumik nilliummernerit tusarsaapput. Qalipaasup qalipaanialerami kalaallit inuiattut erinisarsuutaat isumassarsiorfigisimavaa.
Qaqqat, kangerluk imarlu uumasorpassualik Akap ilisarnaatigisaanik tungujuartunik qaquartunillu qalipagaq qalipakkami 2 meeterisut takissuseqarlunilu 1½ meeterisut portutigisumi takussaapput. Qalipagaq Royal Greenlandip Nuummi qullersaqarfiani ullumi tallimanngornermi uleerneqarpoq.
Royal Greenlandip pisortaanera Mikael Thinghuus uleersinnginnermi oqarpoq, qullersaqarfiup allilerneqarnerani qalipagaq inaarutaasutut taaneqartariaqartoq.
- Siulersuisunit periarfissinneqarluarsimavugut. Siornatigut suliffeqarfipput ingerlalluarpallaanngikkallarmat maani qullersaqarfimmi tattorliuuttarsimavugut. Suliffeqarfik maanna ingerlallualerpoq, eqqumiitsuliamillu ukiuni untritilinni tulliuttuni atasinnaasumik pulaartorisartagassatsinnit alutorsaatigineqarsinnaasumik peqarsinnaalerpugut, pisortaaneq Mikael Thinghuus oqarpoq.
Aka Høegh oqaluttuarpoq kalaallit inuiattut erinarsuutaannit Jonathan Petersenimit taalliarineqarlunilu erinniamit isumassarsitinneqarsimalluni:
- Siuaasatta imarsuaq inuussutissaqarfigisimavaat Royal Greenlandillu pisuussutit immamit minguinnerpaameersut nunarsuarmut ingerlateqqippai.
Kalaallit inuiattut erinarsuutaanni versit pingajuat qalipaasup isumassarsiorfigisimavaa. Taannalu imaappoq:
Qaqqaasa saavini
kangerluillu paanni
:/unipput inuii:/
Imartik pissaqarfigaat
atorluakkaminnik;
Kalaallimmi pigaat
soraajuerlutik
Allattoq: Káte Hansen, kaha@royalgreenland.com
Assit: John David Eriksen
Asseq
