Nipisaat suaat qerisiut Paamiuneersut
Paamiuni Royal Greenlandip tunisassiorfiani nunatsinni nunanilu allani pisisartunut nassiuteriaannarnik nipisaat suaannik qerisunik tunisassiuleruttorput. Nipisaat suaat tunineqaraangata imermi tarajulimmi salinneqariarlutik poortorneqariarlutik qerititat tunisassiarineqarneri nutaajuvoq siorna misiliummik Paamiuni tunisassiarineqartut. Ukioq manna nipisaat suaat tunisat tamarmik nutaajutillugit qeritillugit tunisassiat toqqaannartumik pisisartunut nassiunneqassapput.
- Ukioq manna nipisaat suaannik tunisineq aprilip qulingani aallartimmalli maannamut nipisaat suaat qirititat 27 tons missingi tunisassiarereerpavut. Nipisaat suaat nutaajupput akutissalersorneqaratillu. Suaat tunineqarnerisa kinguninngua imermi procentimik ataatsimik taratsunik akulimmi salinneqariarlutik 100 grammminik aammalu 6,2 kiilunik annertussuseqartunut poortuutissanut poortorneqariarlutik qeritinneqartarput pisisartunut nassiunneqariaannanngorlugit. Kingusinneruskkut aamma kiilukkaartunik poortuissaagut, Paamiuni tunisassiorfiup ingerlatsisua Ilannguaq Abrahamsen oqarpoq.
- Nipisaat suaannik qerisunik tunisassiorneq siornamut naleqqiullugu suliassaqartitsilluarpoq maanna sulisut siornarnit marloriaammik amerlanerusut sulisorineqarmata. Apriilip qulingani aalisartut nipisaat suaannnik tunisillutik aallartinneraniit katillugit ullut 47-it suannik qerititerilluta suliaqarnitsinni inuit 20-it sulisorissavavut, Ilannguaq Abrahamsen oqarpoq.
Paamiuni Royal Greenlandip tunisassiorfiani saattuat qalerallillu maannakkorpiaq aamma tunisaapput, kingusinnneruskkut saarullinniarneq aallartippat saarulliit nerpii Paamiuni tunisassiarineqassammata maanna inuit 70 - it sulisorineqartut saarullinniarneq aallartippat sulisut 90-it sulisorineqalissapput.
Allattoq:Inga Egede, ineg@royalgreenland.com
Assit: Tobias Tobiassen
Asseq
