Royal Greenland saarullinnik uumatitsivimmiititanik tunisassiornialerpoq
Maniitsumi 2014-imi aasaagaa angallat uumatitsivittalimmik misileraalluni saarullinnik assartuineq iluatsilluarmat Royal Greenlandip apriili 2015-imiit saarullinnik uumatitsivimmiititanik tunisassiorneq annertusisaq ingerlannialerpaa.
- Aap, 2014 – imi misileraaneq iluatsilluarpoq. Nioqqutissiat tunisassiarineqartut pitsaassutsimikkut pitsaalluinnartuupput, taamaattumik 2015-imi nioqqutissiassat 2.000 tons angullugit tunisassiariniarinissaat anguniarniarparput, Royal Greenlandimi tunisassiornermi pisortaq Lars Nielsen oqarpoq.
Pitsaassuseq ajunnginneruvoq
Aalisariutit bundgarnersortut Maniitsumeersut sisamat tallimat nioqqutissassanik tunioraasoralugit misileraalluni aalisarnermi siunertaavoq Kalaallit Nunaanni saarulliit bundgarnersorluni pisat pitsaanerusunngorlugit tunisassiarisinnaanissaat aammalu nioqqutissiassat ungasissumut angallanneqarsinnaanersut paasiniarneqarpoq.
- Isumaqarpugut milileraaneq iluatsittutut nalilernissaanut tungavissasaqarluartoq, tamannami misileraanerup inernerata takutimmagu. Taamaattumik pilersaarusiaq annertusillugu 2015 –imi ingerlannissaa siunniupparput, Lars Nielsen oqarpoq.
- Soorngunami misileraanerup siunertaa pingaarnerpaaq tassaavoq saarulliit tunisaanerisa akitigut appasinnerat pitsaasumut saatsinnissaa. Bundgarnersorluni aalisakkanik nunarsuarmi niueruteqarnermi akit appasimmata qaffasissumik pitsaassusilinnik tunisassianik aningaasatigut isertitsilluarsinnaasunik ujartuilluta periutsit nutaat atorlugit inerisaanissaq pingaaruteqarluinnarpoq, Lars Nielsen nassuiaavoq.
Aalisakkat uumatitsivimmiitinneqartut aningaasarsiutigineqarluarnissaat tunngavigalugu anguniarneqarpoq aalisakkat amerlanerpaat tunisassiarineqarnissaat, taammattumik 2015-imi aalisakkat 2.000 tons angulligit tunisassiarineqarnissaat anguniarneqarpoq.
- Misileraaneq isumalluarfiuvoq, kisiannili periuseq atorlugu aningaasarsiorluarnissaq tunngavilerneqassappat 2015-mi saarullinnik uumatitsivimmiititilluni misileraaneq aalisakkat annertuumik amerlassusillit tunisassiarineqartariaqarput, Lars Nielsen naggasiivoq.
Saarulliit uumatitsivimmiititat pillugit allaaserisaq Navigatiomi saqqummeqqammersumi atuarneqarsinnaavoq uani
Allattoq Inga Egede, ineg@royalgreenland.com
Assit: RG
Asseq
