- Anguniakkakka piviusunngortissinnaanngorpakka
Ujakkaartartoq Karl-Peter Kristensen taama oqarpoq
Ujakkaartartup Karl-Peter Kristensenip aningaasanik tapiiffigineqarnissamut qinnuteqaataa Royal Greenlandimi tapiisarnermut ataatsimiititaliap akueraa. Taanna maanna unammisaqattaarnerni pingaarutilinni Finlandimi, Østrigimi Schweizimilu ingerlanneqartussani peqataasinnaanngorpoq. Piareersimasutullu misigisimavoq.
Suna tamarmi aallartippoq Aasianni 1999-imi. Taamani arfineq-pingasunik ukioqarluni ujakkaarutit ateqqaarpai. Taamanili ujakkaarneq nuannarilluinnalerpaa. Maanna 24-nik ukioqarpoq Tromsømilu Norgep avannaani najugaqarluni. Royal Greenlandip timersortartunut piukkunnaatilinnut aningaasanik tapiissuteqarnerani Karl-Peter Kristensen ukioq manna taperneqarpoq.
- Ujakkaartarnera Royal Greenlandimiit tapersersorneqarmat nuannaarutigeqaara. Maanna anguniakkakka piviusunngortissinnaanngorpakka. Unamminerit pingaarutillit arfinillit 2016 aallartitsinnagu peqataaffigissallugit anguniarpara. Taakku unammisaqattaarnissat aallaaviulluarsinnaapput norskit januaarimi 2016-mi unammisaqattaartitsinissaanni, ujakkaartartoq pilerisoq oqarpoq.
Ujakkaarnermik aallusilluartoq
Karl-Peter Kristensen 17-inik ukioqarluni ujakkaarnermik aallussaqarluni ilinniarnertuunngorniarfimmut ilinniariartorluni Tromsømut 2008-mi nuuppoq. Maanna aqutsineq, pilersitsiniarneq aamma niuerneq Tromsøp universitetiani ilinniarpai. Karl-Peter qaammatip tulliani unammiartorluni Finlandimut aamma Østrigimut decemberimilu Schweizmut aallassaaq.
- Unamminissanut piareersarninni akunnerpassuit sungiusarnermut atortarpakka, aamma ujakkaarneq inuuninni pingaaruteqaqaaq. Angalanissanut billetsit, unnuiffissanut aamma nerisaqarnermut aningaasartuutissakka Royal Greenlandimit akilerneqassammata qujamasoqaanga. Taamaammat anguniakkama anguniarnerani upperineqarlungalu tatigineqarnera paasisarpara. Tamanna takutitsilluarusuninnut assut pingaaruteqarluinnarpoq, Karl-Peter Kristiansen oqarpoq.
Unammersuaarnerit
Karl-Peter Kristensen anguniagaqarluarpoq. Unammisaqattaarnissat piffissami tulliuttumi pisussat maanna piareersarfigai, aammali nunarsuarmi ujakkaarluni unamminerit angorusutarai.
- Massakkut piffissami sisorarfiusumi nuannissagaluarpoq nunarsuaq tamakkerlugu ujakkaarluni unamminernut anngussinnaaguma. Taamaammat piffissami tulliuttumi piareersarfigerusuppara VM 2017, Lahti, Finlandimi ingerlanneqartussaq. Aamma neriuutigaara OL 2018 Korea Kujallermi ingerlanneqarlerpat peqataanissara, Karl-Peter Kristensen oqarpoq.
Karl-Peter Kristensenip ilinniagarisani aqutsineq, pilersitsiniarneq aamma niuerneq naammassiguniuk 2016-imi bachelorinngussaaq.
Tekst: Nathan Kreutzmann, nakr@royalgreenland.com
Foto: RG
Asseq
