Aalisarnermik aallutaqartuni sallersaaneq inuussutissalerisunilu sallersaasuni qulingiluaattut inissisimaneq
Danmarkimi suliffeqarfiit inuussutissalerinermik aallutaqartut anginerpaat allattorsimaffiat malillugu Royal Greenland 2013/14-imut ukiumoortumik naatsorsuutini angusatigut sallersaasut 100-usunit qulingiluaattut inissisimavoq. Taamatuttaaq Danmarkimi suliffeqarfiit aalisarnermik aallutaqartut anginerpaat allattorsimaffiat malillugu Royal Greenland kaaviiaartitatigut sallersaasut 14-iusunut sallersaasutut inissisimavoq.
Danskit inuussutissalerineq pillugu atuagassiaata LevnedsmiddelBladet-ip Danmarkimi suliffeqarfiit inuussutissalerinermik aallutaqartut anginerpaat allattorsimaffiannik ukiut tamaasa saqqummiisarpoq, tamatumanilu ukiumoortumik naatsorsuutaanni kingullerni angusaat sanilliuttarlugit. Royal Greenlandilu sallersaasuni 100-usuni qulingiluaattut inissisimavoq, tamatumani 2014-imi ilanngaaseereerluni angusai 136 millioner koruunit missaaniimmata. Allattorsimaffimmilu tassani immuliorfissuaq Arla Foods Amba sallersaavoq, tamatumani ilanngaaseereerluni angusai 4414 millioner koruuniummata. Allattorsimaffimmi allerpaatut inissisimavoq Mejerigaarden A/S, tamatumani ilanngaaseereerluni angusai 11 millioner koruuniummata.
Taamatuttaaq Wilhelmshavenimi tunisassiorfiup tunineqarnerata kingunerisaanik suliffeqarfissuup Royal Greenlandip 2013/14-imi kaaviiaartitai appariarsimasut atuagassiami LevnedsmiddelBladet-imi ilaatigut atuarneqarsinnaavoq. Suliffeqarfissuulli Royal Greenlandip 2014-imi kaaviiaartitai appariarsimagaluartut angusai ukiup siuliani angusaanut sanilliullugit pitsaanerupput, tamatumanilu suliffeqarfissuup Royal Greenlandip oqaluttuarisaanerani isertitatigut aatsaat taama angusarissaartigaaq.
Danmarkimi suliffeqarfiit inuussutissalerinermik aallutaqartut anginerpaat 100-usut allattorsimaffiat linkimi ataaniittumi takusinnaavat:
http://ipaper.ipapercms.dk/TechMedia/LevnedsmiddelBladet/2015/9/
Asseq
