Mamartut immameersut
Nuummi Niuernermik Ilinniarfimmi ilinniartut suliffeqarfiit assigiinngitsut pillugit sapaatip-akunnerani kingullermi nittarsaassimmata Royal Greenland nittarsaanneqartut ilagaat. Ilinniartut suliffeqarfik Royal Greenland soqutiginartillugu nittarsaakkusussimavaat. Royal Greenlandip tunisassiai pillugit nittarsaassineq qulequtserneqarsimavoq “Mamartut immameersut”
- Royal Greenland Kalaallit Nunaanni sunniuteqarluarpoq, taamaammat suliffeqarfimmik nammineq toqqakkatsinnik nittarsaassisussanngoratta Royal Greenland nittarsaatissallugu tulluarluinnartuutipparput, Niuernermik Ilinniarfimmi pisiniarfimmi sulisussatut ilinniartoq Nivi Rosing Olsen oqarpoq.
Niuernermik Ilinniarfik suliffeqarfinnik nittarsaassinermi aaqqissuivoq, ilinniartulli nittarsaassineq namminneq piviusunngortippaat. Nivi Rosing Olsen ilinniaqatini allat pingasut peqatigalugit Royal Greenland nittarsaanniarlugu aalajangerpaat, namminneerlutillu suliffeqarfimmut saaffiginnillutik.
- Nittarsaassinitsinni atugassatsinnik Royal Greenland tunniussivoq. Tamussiussassat assigiinngitsut soorlu sushit, aalisakkat panertut aamma atuagassat paasissutissanik imallit nittarsaassinitsinni saqqummiuppavut. Saqqummiussavut soqutigineqarluarput tigulluarneqarlutillu, Nivi Rosing Olsen oqarpoq.
Ilinniartut suleqatigalugit
Niuernermik Ilinniarfimmi ilinniartut saaffiginninnerat nittarsaanneqarnissamut periarfissatsialattut Royal Greenlandimit isigineqarpoq.
- Nunatsinni ilinniartut tapersersorusuppavut, taamaammat saaffigineqarnerput nuannaarutigaarput. Taamaalilluta aamma Royal Greenland avammut pitsaasumik nittarsaanneqarpoq, tunisassiallu Nunatsinni tunisassianik tuniniaavimmeersut pitsaasut mamartullu nittarsaanneqarlutik, Royal Greenlandimi Nunatsinni tunisassianik tuniniaavimmi tuniniaasoq Kaassannguaq Zeeb oqarpoq.
Niuernermik Ilinniarfimmi ilinniartut suliffeqarfinnik nittarsaassineranni Kalaallit Nunaanni Brugsenit Pisiffillu aamma nittarsaanneqarput.
Allattoq: Nathan Kreutzmann, nakr@royalgreenland.com
Assit: Nuummi Niuernermik Ilinniarfik