Nuummi bundgarnersorluni aalisarneq aallartiaarpoq
Ukioq manna Nuummi bundgarnersorluni aalisarneq aallartiaarpoq. Aalisariutit marluk saarulliit 56 tonsit Royal Greenlandip tunisassiorfianut ullut qulit kingulliit ingerlaneranni tunimmatigik ukioq manna saarullinnik tunisisoqarluarnissaa Royal Greenlandip Nuummi tunisassiorfiata ingerlatsisuata isumalluarfigaa
- Aap, bundgarnersorluni aalisarneq aallartilluarpoq. Aalisariutit marluk aalisariarnermi siullermi tamarmik immikkut 15 tonsit missingi tunivaat. Mannamut taakku aalisariutit saarulliit katillugit 56 tonsit tunereerpaat. Tunineqartut taakku siorna bundganersorluni aalisarnerup aallartinnerani tunineqartunit 20 tonsiusunit annertuneroqaat. Taamaattumik ukioq manna bundgarnersorluni aalisarneq siusinnersukkut aallartiinnarani aamma tunineqartut annertunerummata ukioq manna saarullinniarluni aalisarneq isumalluarfigaara, Royal Greenlandip Nuummi tunisassiorfiani ingerlatsisoq Theo Didriksen oqarpoq.
Saarullinnik tunisineq ingerlalluaannasappat piffissami aggersumi tunisassiorfimmi sulisut amerlineqassapput.
- Sulisut 20 –it missaanik amerlassuseqartut aalajangersimasumik sulisorivagut. Saarullinnik tunisineq ingerlalluaannassappaut aamma aalisariutit amerlanerusut uagutsinnut tunisisalissappata sulisut qulinik ilareernikuusavut piffissami aggersumi ilaqqissavagut, Theo Didriksen oqarpoq.
Pitsaassuseq qaffasinnerusoq
Tunisasssiorfiup ingerlatsisua aamma oqarpoq siusissukkut bundgarnersorluni aalisarnerup aallartinnera tunisassiat pitsaassusaannut iluaqutaasoq.
- Saarulliit nunatta sineriaani ammassaqalinnginnerani pisarineqartartut qaffasinnerusumik pitsaassuseqartarput. Saarulliit ammassaqarnerata nalaani pisarineqartartut orsoqarnerujussuusarmata saarulllit orsoqarpallaartillugit tunisassiarineqartut nerpii pitsaassutsikkut appasittarput. Ammassaqalinnginneranili pisarineqartut pitsaasumik nerpeqartarmata qaffasinnersumik akeqartinneqartarput, Theo Didriksen nassuiaavoq.
Royal Greenlandip Nuummi tunisassiorfiani nipisat suaat qalerallillu aamma tunisaapput.
- Nipisat suaannik tunisineq massakkut ingerlalluanngilaq, kisiannili umiatsiaarsorlutik aalisartut qulit 15-illu akornanni amerlassusseqartut ingerlaavartumik qaleralinnik tunisisarput, Theo Didriksen oqarpoq.
Bundgarnersorluni saarullinniarluni aalisarneq qaammatini junimi, julimi aggustusimilu annerusumik ingerlanneqartarpoq. Siorna qaammatit taakku ingerlanerini saarulliit 765 tonsit Nuummi Royal Greenlandip tunisassiorfianut tunineqarput.
Allattoq: Inga Egede, ineg@royalgreenland.com
Foto: RG
Asseq
