Ukiuni 40 –ini atorfilik nalliuttorsiutigineqarpoq
Kilisaammi Nataarnami nioqqutissiornermi pisortaq, Bergur Tausen, Royal Greenland A/S-imi Ice Trawl A/S-imilu atofilittut ukioq manna ukiunik 40-inngortorsiorpoq
Bergur Tuasenip ukiuni 40-ini Royal Greenland A/S-imi Ice Trawl A/S-imilu atorfeqarsimanera decemberip 20-iani nalliuutorsiutigineqarpoq. Tamanna pivoq kilisaammi Nataarnami inuttat juullilerneranut atatillugu Hotel Sisimiuni ataatsimuualaartinneqarneranni.
Ice Trawl A/S-imi siulittaasoq Ove Rosing Olsen nereqatigiinnermi Bergur Tausen qutsavigalugu oqalugiarfigaa ukiorpassuarni sullissilluarsimaneranut qujaffigalugu. Avataasiorluni uutiterineq aallarteqqaarmalli Bergur Tausen sulisuuvoq.
Qujaniarluni oqalugiaat
Ove Rosing Olsenip Bergur Tausen qujaniarfigalugu oqalugiarami ima oqalugiaateqarpoq:
- Bergur 27. oktober 1954-mi inuuvoq Thorshavnimi. Ataataa Jesper Tausen taamani aalisariummik Kalaallit-Nunaata kitaani saarullinniartumik ingerlatsivoq. 1956-mili landshøvdingip angallataani H.J. Rinkimi naalaganngorpoq. 1956 naalersoq nulia Helene Dronning Alexandinimut ilaalluni nunatsinnut nuukkiartorpoq meeqqani 12-iusut ilagalugit. Bergur nukarliup tulliusoq marluinnarnik ukioqartoq.
- Bergur Nuummi atuartuuvoq taamatullu kalaallisut, danskisut Savalimmiormiutullu oqaaseqarluni. 13-iinnarnik ukioqarluni Atlantikup avannaani aalisalerpoq siullermik ammassassuarniartumut kingornalu saarullinnik nerpiliortumut ilaalluni. Angalanerit taamani qaammatinik 6-nik sivisussuseqartarput.
- September 1974-imi KGH-p kilisaataa Elias Kleist Savalimmiuni Fuglefjordimut tikippoq Bergurip angajua igasoralugu.Tamaani ataataa Paamiuni imarsiornermut atuarfimmi ilinniartitsisuuvoq. Bergur ikinissamut qinnuteqarpoq, akuerisaallunilu. Taamanili siullermik KGH-mi, kingornalu RG-mi Ice Trawlimilu sulilerpoq. Umiarsuit M/tr. Elias Kleist, M/tr Paamiut, M/tr Simiutaq, M/tr Kiliutaq 2001-miillu M/tr Nataarnaq suliffigisimavai. 1977-imili M/tr ukioq ataaseq suliffigaa.
- Bergur qutsavagaarput sulilluarsimaneranut neriulluta suli sivisuumik suleqatigissallugu, Ove Rosing Olsen oqarpoq.
Bergur-ip nulia Åse (in. Petersen) Paamiormiuuvoq aappariillu Paamiuni najugaqarput, Paneqarput Thorshavnimi najugalimmik. Suna tamarmi ajussanngippat naatsorsuutigaat junimi ernutartaarnissartik.
Asseq: Torben Lund
Asseq
