Nutaaq Cod amerlasuukkaat maanna sinerissami
Royal Greenlandip tunisassiaataa nutatsinneersoq nunatsinni amerlasuukkaanik pisisartunit maanna pisiarineqarsinnaanngorpoq.
Saarullimmik tunisassiaq Nutaaq Cod Europami niuerfinnut naatsorsuussaaqqaartoq Kalaallit Nunaanni igaffeqarfissuarnit, napparsimmavinnit, neriniartarfinnit, cafenit allanillu maanna pisiarineqarsinnaanngorpoq.
Nutaaq Cod 5 aamma 10 kiilukkaatut maannamuugallartoq pisiarineqarsinnaapput. 5 kiilukkaat nerpinnik amitalinnik 225-450 gramitut oqimaassusilinnik imaqarput, 10 kiilukkaallu aamma amitalinnik 450-900 grammikkaanik imaqarlutik.
- Tunisassiaq Kalaallit Nunaanni niuertarfinnit suli noqqaassutigineqanngilaq, pisisartulli akornanni piumaneqalissagaluarpat niuertarfinnit pisiarineqarsinnaalernissaa naatsorsuutigisinnaavarput, Kalaallit Nunaanni tuniniaasarfimmi tuniniaasoq Kaassannguaq Zeeb oqarpoq.
Nutaaq Cod Royal Greenlandip Maniitsumi tunisassiorfiani tunisassiaavoq. Saarulliit uumatillugit najukkami umiatsiaararsortut bundgarniutaannit uumatitsiviliaanneqartarput, tassanilu ulluni arlalinni uninngateriarlugit angallammit uumatitsivimmit Maniitsuliaateriarlugit tunisassiarineqartarput. Taamaasillutik saarulliit nalunaaquttap akunnerisa marluk ingerlanerinnaanni immamit qaqinneqarneranniit tunisassiareriarlugit qeritinneqartarput.
Tunisassiap paasissutissartai assimi ilanngussami paasisaqarfiginerusinnaavatit.
Allattoq: Káte Hansen, kaha@royalgreenland.com
Asseq: John David Eriksen
Asseq
