Suli sikunngimmat ingerlaavartumik tunisassiorsinnaapput
Januaarimi issaasannera pissutigalugu Ilulissani Qasigiannguanilu suli sikunngimmat aalisartut suli Ilulissani Royal Greenlandip tunisassiorfianut tunisisarput. Aalisakkat Ilulissanut tunineqartartut Qasigiannguani Royal Greenlandip tunisassiorfiani tunisassiassanngorlugit assartorneqartarmata, Qasigiannguani tunisassiorneq ulloq manna tikillugu tunisassianik nutaanik tunisassiormat tunisassiorfiup upernaaq tikilllugu tunisassiorsinnanera qulakkeerneqarpoq
Sikuutillugu Ilulissaniit Qasigiannguanut tunisassiassanik assartuineq unittarpoq, ukioq mannali tunisassiassanik assartuisinnaaneq ukiortaamiit periarfissaasimavoq. Tamannalu aalisartunuinnaanngitsoq kisiannili aamma Qasigiannguit tunisassiorfiani ataavartumik tunisassiorsinnaaneranik aamma sulisut ataavartumik sulisinnaaneranik qulakkeerivoq, taama oqarpoq Qasigiannguani Royal Greenlandip tunisassiorfiani ingerlatsisoq Hans Grønvold.
- Angallat namminersortumit pigineqartoq tunisassiassanik assartuinermi atorneqartartoq "Søkongen" decemberimi tunisassiassanik aamma angallassivoq, kisisannili Ilulissani unammillertoqarneq pissutigalugu tunisassiassanik annikitsuinnarnik angallassivoq. Ilulissani tunisassiorfimmi tunisinermi akit decemberimi qaffanneqarnerisa kingorna "Søkongen" ulloq ataaseq allortarlugu tunisassiassanik tonsit qulit 18-illu akornanni usilluni assartuisarpoq. Sapaatit akunnerpassuanngortuni tunisassianik nutaaginnavinnik tunisassioratta tunisassiassat uningasuutit upernarnissaanut naammattut uninngasuutigaavut, Hans Grønvold oqarpq.
Najukkami aalisartut tunisisarput
Royal Greenlandip kilisaataatai avataasiortut ukiap ingerlanerani qaleralinnik qerisunik 650 tonsinik Qasigiannguani tunisassiassanik tulaassivoq. Tunisassiassat taakku marsi tikillugu tunisassiorfimmi ingerlaavartumik tunisassiorsinnaaneq qulakkeerpaa. Kisiannili tunisassiorfik suli Ilulissaniit tunisassassanik pajuttorneqarmat taakku uninngasuutit uninngatikkallarneqarsinnnaapput.
- Qasigiannguani aalisartut maanga aamma suli tunisisarmata januarimi silap issaasannerujussua aalisartunut, tunisassiornermut aammalu suliassaqartitsinitsinnut iluaqutaavoq, Hans Grønvold oqarpoq.
Qasigiannguani tuniassiorfimmi inuit 70-it missingi sulisorineqarput.
Allattoq: Inga Egede, ineg@royalgreenland.com
Assit: Nathan Kreutzmann, Inga Egede
Asseq
