Affaannarmik tunisassiorput
Qeqertarsuatsiaani Royal Greenlandip tunisassiorfiani aalisartut tunisinnaasaat tallimanngormat juunip pingajuani killilersorneqalerput. Tunisassiorfimmi sikuliorfiup ajoquteqarnera killilersuilernermut pissutaavoq. Tamassuma nassatarisaanik maanna tunisassiorfimmi tunisat tunisassiarineqarsinnaasut affaannai, tassalu ullormut tonsit arfinillit tunisassiarineqarsinnaapput
- Sikuliorfiup ajoquteqarnera pissutigalugu killilimmik tunisineq tallimanngormat atuutilerpoq. Ullormut tunisat ullut tamaasa qeritinneqartariaqarmata ullormut tonsit arfinillit missingi kisiisa tigusinnaagatsigit umiatsiaararsorlutik aalisartut ullormut karsinik 15-inik aalisariutillu nunaqarfimmi pingasuusut ullormut karsinik 20-inik tunisisinnaalerput, Qeqertarsuatsiaani Royal Greenlandip tunisassiorfiani ingerlatsisuugallartoq Simon Bendtsen oqarpoq.
Tunisassiorfimmi ingerlatsisuugallartoq aamma oqarpoq aalisagaqarluarnerata nalaani 15-inik sulisoqartaraluarlutik maanna inuit arfineq pingasuinnaat tunisassiornermi sulisorineqartut.
- Ullormut tunisassiarisinnaasavut killleqarallartillugit ajoraluartumik sulisunik unnukkoortunik pilersitsisinnaanngilagut. Tunisassiorfimmut tunineqartut suliaripallassinnaajumallugit saarulliit niaqoqanngitsut tigooqqartariaqaratsigit ullukkoortuinnarnik sulisoqarsinnaagatta sulisut arfineq pingasuinnaat maanna sulisoraavut, Simon Bendtsen oqarpoq.
Ajoqutaa nanineq sapilerpaat
Ukiup aappaata affaata matuma siorna nunaqarfimmi tunisassiorfimmi sikuliorfik nutaavik ikkussuunneqarpoq.
- Siorna 2015-imi ukiaanerani sikuliorfik naak nutaajugaluartoq ajornartorsiutigilerparput. Sikuliorfimmik ikkussuisut aammalu sikuliorfimmik sanaartortut sikuliorfik arlaleriaqalugu aaqqiivigeriartaraluarpaat, kisiannili ajoqutaa paasineq saperpaat. Taamaattumik Royal Greenlandip aalajangiuppaa sikuliorfimmik allamik nutaamik ikusuussisoqassasoq.
- Aalisagaqarluarnerata nalaani tunisanik killilersuineq pinngitsortikkumallugu uanga oqartussaasuuguma ullut 14-init ingerlaneranni sikuliorfimmik nutaamik ikkussuisoqassagaluarpoq. Qujanartumillu maannakkorpiaq inissisimanerput aalisartut paasilluarlugu bundgarnitik ningittakkatillu unnuaanerani ullaasaakkullu amooriartalermatigik ullaakkut tunisalermata uagut ullup naannginnerani tunisat qerititerlugit tunisassiarisinnaavagut, Simon Bendtsen oqarpoq.
Junip 25-iata missaani kilisaat Sisimiut Qeqertarsuatsiaat eqqaani tunitsivittut ivertinneqassaaq.
Allattoq: Inga Egede, ineg@royalgreenland.com
Asseq: Simon Bendtsen
Asseq
