Kangaatsiami nerpinnik tunisassiorneq aallartippoq
Kangaatsiami Royal Greenlandip tunisassiorfiani saarulliit nerpiinik tunisasssiorneq ippassaq majip pingajuani allaartippoq. Nerpinnik tunisassiornerup aallartinneqarneratigut sulisut nutaat 30-it sulisorineqalerput. Qaammatip naannginnerani tunisassiorneq aallartilluarpat suliust nutaat allat 30-it sulilersinnaajumaartut tunisassiorfiup ingerlatsisuata neriuutigaa
- Saarulliit nerpiinik tunisassiorneq ipassaq aallartippoq. Atortutigut teknikkikkut ajoquteqarneq pissutigalugu tunisassiornerup aallartinnera kigaakkallarpoq, kisianni qaammatip uuma naannginnerani tunisassiorneq ingerlallualerpat sulisut allat nutaat 30-it sulilersinnaajumaartut neriuutigaara, taama oqarpoq Kangaatsiami Royal Greenlandip tunisassiorfiani ingerlatsisoq Abia Thorsteinsen.
Kangaatsiani aalisartut saarulliit tonsit arfinillit ippassaq tuniassiorfimmut tunivaat. Tulaassanit taakkunannga tonsi ataaseq nerpiliaralugu tunisassiarineqarpoq sinnerilu qeritillugit tunisassiarineqarput.
- Aallartilluariarutta ullormut tonsit qulit missingi nerpiliaralugit tunisassiarisarnissaat anguniarparput, tunisassiorfiup ingerlatsisua oqarpoq.
Imissaaleqineq
Kangaatsiami imissaaleqineq pissutigalugu siorna nerpinnik tunisassiorneq naatsorsuutigisamiit siusinnerusukkut oktonerimi unitsinneqarpoq. Illoqarfiup imeqarniarnera tamakkiisumik suli aaqqiivigineqanngimmat tunisassiornermi imeq atorneqartoq annnikinnerpaaffimmiitinneqarpoq.
- Qaammammut imeq 1000 kubik miiteriinnaat atorsinnaatitaagatsigu nerpinnik tunisassiorluta aallartinitsinni imermik atuinerput annikinnerpaamiitipparput. Illoqarfiulli imeqarniarnera Nukissiorfinniit aaqqinniarneqarmat neriuutigaara qaammatip naannginnerani aaqqinneqassasoq. Taamaattumik naatsorsuutigaara saarullliit 15 tonsit 20 tonsillu akornanni annertussusillit ullormut tunineqarsinnaalerumaartut, Abia Thorsteinsen oqarpoq.
Kangaatsiami Royal Greenlandip tunisassiorfiani saarullinnik qerititerilluni tunisassiorneq siornatigut ingerlanneqarnikuuvoq . Tunisassiorfiullli nutarterneqareernerata kingorna siorna majip 28-iani saarulliit nerpiinik tunisassiorneq aallartinneqarpoq.
Allattoq: Inga Egede, ineg@royalgreenland.com
Assit: Abia Thorsteinsen
Asseq
