Nuummi misigisarpassuit
- Kajumissutsimik sulisut akornnani misigisakka nuanneqaat. Inuit inussiarnisaartut, ikiuukkusuttut aammalu nuannaartut naammattoorpakka aamma kajumissutsimik sulisuusugut akornatsinni suleqatigiilluaqaagut. Inuit Issittormiut Unammiuaaqatigiinneranni Arctik Winter Gamesimi aaqqissuisut nersualaarusuppakka. Aaqqissuussinerup annertuup iluatsinnissaa anguniarlugu suliaq annertoqaaq, taama oqarpoq 55-inik ukiulik Johan Rosing. Taanna Paamiuni Royal Greenlandip tunisassiorfiata quersuani ulluinnarni sulisarpoq.
Johan Rosing Royal Greenlandimi sulisut sineriammeersut, Nuummeersut aammalu Svenstrupimeersut 25-it allat peqatigalugit Nuummi AWG-qartoqarnerani kujumissutsimik sulerusullutik nalunaartut ilagaat. Johan Rosing nuliani kajumissutsiminik aamma sulisoq peqatigalugu februarip 29-ianili AWG-mi timersoriat tikinnissaannut piareersaaqataapput.
- Ullut siulliit pingasut sisamat Hans Lyngep Atuarfiani aamma Atuarfik Ukaliusami timersoriat siniffissaat katiterlugit sulivunga. Inuusuttut timersoriat tikerareermatali Ukaliusami atuarfiani atuarfiannilu allani AWG-mi nakkutilliisutut sulivunga.
Ammasuulluni kiinnerpoq
Johan Rosing oqaluttuarpoq inuit nalusami akornanni sulinissaminut ittuussasoraluni pissangasimalluni.
- Kisianni inuit tamarmik inussiarnisaarlutillu ikiuukkkumagaarmata erniinnaq pissangajunnaarpunga. Kuajumissutsimik sulisut timersoriallu akornanni iluarusunneq qiimmasaannarlu malugisassaavoq. Inuit tamarmik nuannaarlutillu qiimangaarmata ittoornanngivippoq, Johan Rosing oqaluttuarpoq, nangipporlu:
- Inuusuttut timersortartut unamminerminni ajugasimariarlutik nuannaarnerat qiimasaartarnerallu takusarpara, kisiannili aamma ilanngui ajorsarsimariarlutik nikallungakujuttut takusarpakka, tamannalu timersornerup ilagaa aamma. Ila timersortartuaqqat inequnaqaat aamma oqaatsit aporfiunngillat tuluttoorsinnaasunik nakkutilleeqateqartuaannarama.
Johan Rosing tallimanngorpat Paamiunut angerlartussaq oqarpoq AWG-mi kajumissutsimik sulinermini nuannersuinnarnik misigisaqarluni.
- AWG 2016-mi kajumissutimik sulinera nuannersuinarnik qiimmaallannartunillu misigisaqarfigigakku suliffeqarfima AWG-mi kajumissutsimik sulinissannut periarfissimmanga qujassutigeqaara, Johan Rosing oqarpoq.
Allattoq: Inga Egede, ineg@royalgreenland.com
Assit: John David Eriksen
Asseq
