Tunisassiorfimmi nutarterineq allilerinerlu iluaqutassaaq
Sulisut sulinerminni atugarisaat pitsaanerusut, aalisartut annertunerusunik tunisisinnaanerat kiisalu tunisassiat marloriaammik annertusineqarsineqartut, tassa tamakkuupput Uummannami Royal Greenlandipi tunisassiorfiani ingerlatsisup Kirsten Jensenip Uummannami Royal Greenlandip tunisassiorfia aasaq juni naasorli nutarterluni allilerneqartup 2017-imi marsimi naammassippat angorusutai
- Tunisassiornitsinni init suliffiginikuusavut pisoqalinikooqisut tunisassioqqilerutta angineruinnaratik aamma nutartigaallutik nutaanik iigalersorneqarnikuullutik aamma natilersorneqarnikuussapput, taamatuttaaq tunisassiornermi atortorissaarutit nutaaliaasut ivertissuunneqarnikuussallutik. Tunitsivimmi aalisakkanik immikkoortiterivimmik ivertitsisoqassaaq taamatuttaaq qerinasuartitsiviit pladefryserit pigeriikkavut pingasut nutaanik marlunnik ilaneqassapput. Aamma aalisakkat niaquinik paperuinullu qeritititsiviit pigeriikkavut marluk nutaanik marlunnik ilassammata qerisunut inissaqartitsineq pitsanngussaaq, Kirsten Jensen oqarpoq, nangipporlu:
- Tunisassiornermi atortorissaarutit naleqquttut, ingammik aalisakkanik immikkoortiterut tunisassiornermi sulisunullu oqilisaaginnarani aamma tunisassianik naammassiuminarlisaassaaq taamanannalu ullumerniit annertunerusunik naammassisaqarsinnaanitsinnik nassataqassaaq.
Anguniakkat
Uummannami Royal Greenlandip tunisassiorfiani qalerallit ilivitsut, qalerallit niaquerlugit paperuerlugit qerititat aamma saarulliit qerititat tunisassiarineqartarput.
Ullormut 40 tonsit tunisassiarineqarsinnaapput, kisiannili ilaatigut sulisussaaleqineq pissutigalugu ullormut 25 tonsit 28 tonsillu akornanni annertussusillit tunisassiorfimmi tunisassiarineqartarput.
- Siornatigut tunisassiornitsinni ajoraluartumik ullut tamangajaasa sulisut qulit 15-illu akornanni amigaatigisarpavut. Taamaattumik tunisassiornermi malinnaasinnaajumalluta aamma aalisakkanik igitsinnaartarneq pinngitsoorniarlugu allatut ajornartumik aalisartut pilersaarusiukkamik tulassisarnerat atuutsittariaqartarparput. Tunisassiorfiup nutarterneqarluni allinerneqarnerata ilaatigut siunertaraa tunisassiat marloriaatinngortinniarnissaat, tassa ullormut 50 tonsit tunisassiarineqartalernissaat. Taamaattumik aalisartut pilersaarusiukkamik tulaassisarnerat annikinnerusumik siunissami atuutsinneqartarnissaa neriuutigaarput, Kirsten Jensen oqarpoq.
Paarlagaallutik sulisut
Ulapaarfiup nalliuteruttorfiani sulisut 80-it ulapaarfiutinnagulu sulisut 60-it tunisassiorfimmi sulisorineqartarput.
- Tunisassiorfik nutarterneqareerlunilu allilerneqareerluni marsimi naammassippat paarlagaattumik tunisassiorneq pilersikkusukkatsigu sulisut qulinik ilasinnaajumaarlutigik neriuutigaarput, Kirsten Jensen oqarpoq.
Uummannami tunisassiorfiup nutarterluni allilerneqarnerani umiarsuarmik tunitsivimmik Royal Greenland ivertitsinikuuvoq. Tunisassiorfimmi sulisut 12-it umiarsuarmi tunitsivimmi sulisupput, taakkulu umiatsisaararsorlutik aalisartut qaleralinnik pisassaarukkallarneranni umiarsuarmi tunitsivimmi saarullinnik tunisassiorput. Sulisut allat 17-it tunisassiorfiup nutarterlunilu allilerneqarnerata nalaani tunisassiorfimmi assigiinngitsunik suliaqarlutik sulipput.
Allattoq: Inga Egede, ineg@royalgreenland.com
Asseq
