Royal Greenland Danmarkimi nerisassanik maanngaannartitsinermik pinaveersaartitsinermi peqataavoq
Royal Greenlandip kattuffik Fødevarebanken peqatigalugu isumaqatigiissut oktobarimi atsiorpaa, taamaasillunilu suliffeqarfiit angisuut soorlu Arla, Dansk Supermarked aamma Unilever nerisassanik maanngaannartitsinermik pinaveersaartitsinermut peqataasunut ilannguppoq, ilutigalugulu innuttaasut inooqataanermi ajornartorsiutillit ulluinnarni nerisassanik pissarseriaannaanngitsut nerisaqarsinnaanissaannut ikiuunnermut peqataalerpoq.
Royal Greenland nakunat nerpiinik Fødevarebankenimut siullermeerluni sapaatip-akunnerani matumani nassiussaqarpoq. Kattuffik Fødevarebanken Danmarkimi nerisassanik maanngaannartitsinermik pinaveersaartitsisuuvoq tamannalu ilutigalugu innuttaasunut inooqataanermi ajornartorsiutilinnut ikiuuttuuvoq. Fødevarebanken inunnut kajumissutsiminnik ikiuuttartunut nerisassanillu maanngaannartinneqartussaagaluanik agguaasartunut atassuteqartarpoq.
Fødevarebankenimi pisortap Karen-Inger Thorsenip oqarnera malillugu Danmarkimiinnaq nerisassat maanngaannartinneqartartut ukiumut 720.000 tonsiupput, taakkualu affaasa pingajorarterutaat nalinginnaasumik atuisartuninngaanneersuunatik suliffeqarfissuarneersuullutillu tunisassiorfinninngaanneersuupput.
Royal Greenlandimi Corporate Sustainability Manageri Lisbeth Schönemann-Paul oqarpoq:
- Fødevarebankenip nerisassanik maanngaannartinneqartussaagaluanik agguaasarnerminut atatillugu inuussutissalerinermi isumannaallisaaneq nerisassallu suminngaanneernerannut tunngatillugu paasissutissanik tunniussisartuussaaq, tamannalu inuussutissanik tunisassiortartunut soorlu uagutsinnut pingaaruteqarpoq.
Royal Greenland nerisassanik maanngaannartinneqartussaagaluartunik inuiaqatigiinnut iluaqutaasumik agguaasarnermut ikiuukkusuttupilussuuvoq.
- Nakunat nerpii nassiussavut qerititsivissuarmi sivisuallaamik uninngasuutigisimavavut. Pisuni taamaattuni Fødevarebankenimut nassiussaqartarnissarput isumatusaarluinnarneruvoq, Royal Greenlandimi pisisartunik sullissivimmi ingerlatsisoq Vibeke Jørgensen oqarpoq.
Fødevarebankenip nerisassat Danmarkimi agguaassimasai 2010-imiit 2015-imut pingasoriaammik annertuseriarsimapput, tamatumani 2010-imi 198 tonsiusimammata massa 2015-imi 651 tonsiusut, taakkualu ullormut nerisassanut inummut ataatsimut naammattunut agguataaraanni 5.000-upput. Fødevarebankenip inuit 150-it kajumissutsiminnik ikiuuttartut ikiortigisarpai, taakkualu allaffissornermut tunngasunik suliaqartarlutillu nerisassanik sapaatip-akunneranut arfinileriarlutik agguaasarput.
Fødevarebanken Danmarkimi kattuffinni nerisassanik taama annertutigisunik agguaasinnaasutuaavoq, kattuffinnillu 120-nit amerlanerusunik soorlu Røde Korsimik, Frelsens Hærimik Kofoeds Skolemillu suleqateqarpoq.
Fødevarebankenip siunissaq eqqarsaatigalugu anguniagaraa, nerisassanik maanngaannartinneqartussaagaluanik Danmarkimi meeqqanut inersimasunullu inooqataanermi ajornartorsiutilinnut agguaanikkut nerisassanik maanngaannartitsinermik nerisassaaleqinermillu pinaveersaartitsineq.
Allattoq: Maria Samantha Lundgaard, CSR-ilerisuni ataqatigiissaarisoq
Asseq: Fødevarebanken.dk
Asseq
