Ammassat suai nunatsinneersut Japanimi piumaneqartut
Royal Greenlandimi tunisassiassanik inerisaanermi ingerlatsisup tunisassiarineqarsinnaasut nutaat misissuiffigereerlugit ammassat suai Japanimut tunisassiarineqarsinnaanerat periarfissaammat, misileraalluni ammassanniarneq aappaagu ingerlanniarneqarnissaa neriuutigaa.
- Qeqertarsuup tunuani ammassannik arnarlunnik angisuunik peqarluarpoq, taakkulu Japanimiit piumaneqarluarput, taamaammat innersuussutigaara aappaagi misileraalluni ammassanniartoqarnissaa, Royal Greenlandimi tunisassianik inerisaanerni ingerlatsisoq, Nikoline Ziemer oqarpoq.
Ammassat suai tunissiarineqalernissaannut pilersaarut Royal Greenlandimi ingerlatsinermi pisortanit akuersissutigineqarpat avannaani Qeqertarsuup tunuiani misileraalluni aalisarneq aappagu ingerlanneqassaaq.
Piumasaqaatit
Japanimiulli ammassat suaannik aqiliulersimanngitsunik piumasaqartut Nikoline Ziemerip oqaatigaa.
- Ammassat sissamut suffiartunnginnerini, tassa suli sissamut pinnginnerini pisarineqartarnissaat Japanimiut piuamasaqaatigaat, suannik suli aqiliulersimanngitsunik piserusukkamik. Japanimiut oqarnerattut ammassat sissamut suffiartoraangamik suai aqiliuusalerlutik imerpalanerulersaramik, Nikoline Ziemer nassuiaavoq.
Japanimiullu piumasaqaataat taakkuinaanngitsut Nikoline Ziemerip oqaatigaa:
- Ammassat pisiarineqartussat aqajarui imaqarnersut, sunillu nerisimanersut misissorneqartassapput, nerisaasa suaat mamassusaat qalipaataallu sunnertarsimammatigit, taamaattumik ammassat aqajarui imaqanngitsut piumaneqarnerupput, Nikoline Ziemer oqarpoq, nangipporlu:
- Ammassat tunisassiarineqartussat iluitsuutillugit qeritiinnarlugit Japanimut nassiunneqartassapput.
Ammassanniarluni misileraalluni aalisarnissamik pilersaarut Royal Greenlandimi ingerlatsinermi pisortaanit akuersissutigineqassappat, Qeqertarsuup tunuani aalisartunit aalisarneqarnissaat takorloorneqartoq, Nikoline Ziemerip oqaatigaa.
Allattoq: Marie Kuitse Kristensen, mkri@royalgreenland.com
Assit: Nikoline Ziemer
Asseq
