Maskiinaq tisaat namminneq iluarsaassinnaalerpaat
Royal Greenlandip tunisassiorfiini Paamiuni, Maniitsumi, Kangaatsiami, Sisimiuni Qasigiannguanilu sulisut aalajangersimasut maskiinanik tisaatinik aqqissuisinnaanermut pikkorissareernerisigut makiinalerisunik nunanit allaneersunik tikisitseqqaanngikkaluarlutik namminneerlutik tisaatit ajortippata aaqqissorsinnaanngorpaat
- Tunisassiorfinni pineqartuni maskiinamik tisaammik baadermaskiinamik taasartagaannik peqarput, taakkulu maskiinat ajortikkaangata tamatigut Polenimiit Norgemiilluunniit maskiinalerisumik Royal Greenlandi tikisitsisarpoq. Tikisitsineq sapaatip akunneranut 50.000 koruunit tikillugit naleqartarpoq. Maskiinalerisunik tikisitsisarneq ukiumut arlaleriarluni pisartoq maanna sulisut pikkorissarsimalersut namminneq aaqqissuisinnaalernerisigut pisariaaruppoq, Royal Greenlandimi sulisoqarnermi siunnersorti Adolf Egede oqarpoq.
Sulisut qulingiluat maskiinamik tisaammik ingutserisinnaanermik ikkussuisinnaanermillu katillugu ulluni aqqaneq-marlunnik sivisussuseqartumik inuit marluk-pingasukkaarlutik 2017-imi februaarimiit aggutusi ilanngullugu Polenimi pikkorissartinneqarput.
- Maannamut inuit arfineq-marluk pikkorissarneqareerlutik naammassisimalereerput. Pikkorissartut kingulliit marluk Polenimi ulluni makkuani pikkorissarnertik naammassissavaat. Pikkorissartut tamarmik naammassippata inuit qulingiluat maskiinamik tisaammik ingutserisinnaanermik ikkussuisinnaanermullu piginnaaneqalissapput, Adolf Egede oqarpoq.
Iluarsaassinissani qilanaaraa
Sisimiuni Royal Greenlandip tunisassiorfiata sulliviani aqutsisoq Aningaaq Larsen Polenimi pikkorissartut ilagaat, taassuma maskiinalerisumik tikisitseqqaanngikkaluarluni nammineq maskiinamik tisaammik iluarsaassisinnaanngornini iluarisimaarpaa.
- Tisaaterput tassa baardermaskiinarput suunngitsuarsunnik ajoquteqaraangat misissortarnera misilittagaqarfigaara, kisianni ulapaarfiujunnaarpat ukiaru siullermeerlunga maskiinap nammineerlunga salinnissaa ikkussuuteqqinnissaalu qilanaareqaara, Aningaaq Larsen Sisimiuni tunisassiorfiup sulliviani aqutsisoq taama oqaluttuarpoq.
Tunisassiorfinni sulisut pikkorissareersimalersut qaammatit marluk pingasulluunniit qaangiunnerini pikorissartitsisuminnit orninneqarlutik misileraaffigineqassapput.
Allattoq: Marie Kuitse Kristensen, mkri@royalgreenland.com
Assit: Aningaaq Larsen/Otto Saamo Hansen
Asseq
