Qasigiannguani saarullinnik tunisassiulerneq iluaqutitaqarpoq
Qasigiannguani tunisassiorfik qaleralinnuinnaq tunisassiorfiunikuugaluartoq ullumikkut saarullinnik aamma tunisassiortalermat tunisassiorfimmi sulisut suliassaarutinngillat
Qasigiannguani tunisassiorfimmi qalerallit tunisassiarineqartartut amerlanerpaartaat Ilulissaninngaaniit tikiunneqartarput, ukiunili kingullerni Ilulissat eqqaani qaleraleqarpiarunnaarnerata kingunerisaanik siornali qalerallit saniatigut saarulliit tisallugit qeritiinnarlugilluunniit Qasigiannguit tunisassiorfiani aamma tunisassiarineqartalerput. Saarullinnillu tunisassiulerneq tunisassiorfiup ingerlatsisuata iluaqutitaqartoq oqaluttuaraa.
- Tunisassiorfitsinni saarullinnut tisaammik maskiinartaarnikuugatta sulisut qaleralikillinerani suliassaaleqiffissaraluaminni saarullinnik tisallutik tunisassiorput. Qalerallit tunisassiatta ikileriangaatsiarnerisa kingunerisaanik suleqatigiiaat naak ataasiinnanngoraluartut taakku qujanartumik suliassaqarusaaginnaavipput, Qasigiannguani tunisassiorfimmi ingerlatsisoq Hans Grønvold oqarpoq.
Qasigiannguani Royal Greenlandip tunisassiorfiani aasaq manna julimi saarulliit katillugit 130 tonsit aalisartunit Qasigiannguani tusisassiorfimmut tulaassorneqarput. Tunisat ilaat tisallugit tunisassiarineqarput ilaallu qeritinneqartut avammut tuniniarneqaqqittussatut nassiunneqassapput.
- Saarullinnik tunisassiornerput suliassaqartitsilluni iluaqutaagaluartoq taamaattoq Qasigiannguani tunisassiorfitsinni aalisagaq akisunerusoq tassa qaleralik suliassatut salliutipparput. Qalerallit tikiussorneqartut annertussusaat apeqqutaalluni saarulliit tisaneqartarput, qaleraleqarneruleraangalli saarulliit tisajunnaarlugit ilivitsuutillugit qeritiinnartarpavut, Qasigiannguani tunisasiorfimmi ingerlatsisoq Hans Grønvold taama oqaluttuarpoq.
Qasigiannguani Royal Greenlandip tunisassiorfiani sulisut mannakkut 96-upput, ulapaarfiullu nalaaniikkaangat sulisut 140-t missaanniittarput.
Allattoq: Marie Kuitse Kristensen, mkri@royalgreenland.com
Asseq: Inga Egede
Asseq
