Kinamiut 38-t Royal Greenlandimi sulilissapput
Kinamiut 38-t tunisassiorfimmi sulisutut Royal Greenlandip tunisassiorfiinut pingasunut suliartorlutik Kalaallit Nunaannut maajip qiteqqunnerani juunillu qiteqqunnerani tikissapput. Royal Greenlandip sulisussaaleqisarnini taamaalilluni ukioq manna pakkeersimaarsinnaanngorpaa aamma tunisassiorfinni tunisassiornerit pitsanngorsarsinnaanngorpai.
Kinamiut 38-t suliartortitassat illoqarfinni pingasuni agguataarneqarlutillu sulilissapput, taakkunannga 19-it Maniitsumi, qulit Qasigiannguani qulingiluallu Uummannami sulissallutik.
- Tunisassiorfinni tunisassiornerit ataavartumik ingerlanneqarnerannik taamatuttaaq aalisartut pisaminnik malunnartumik sukkanerusumik utaqqinarfiuallaanngitsumillu tunisaqarsinnaanerannik kinguneqartumik suliassaminnik naammassinnilluarlutik sulisarnissaat neriuutigalutigulu isumalluarfigaarput, suliffeqarfissuarmi sulisoqarnermi ingerlatsisoq Søren Olsen Damgaard oqarpoq.
Kinamiunik 38-nik suliartortitsisoqarnissaa Qeqqata Kommuneanit aamma Qaasuitsup Kommuneanit akuersissutigineqareerpoq, nunanillu allaneersunut aqutsisoqarfimmit, Udlændingestyrelsenimit, Kinamiut tikisinniakkat tamaasa Kalaallit Nunaanni najugaqarsinnaatillugillu sulisinnaatillugit akuersissutigineqareerpoq.
Royal Greenland nunaqavissunik Kalaallit Nunaanni sumiiffinnit assigiinngitsuneersunik arlalinnik suliartortitsisareerpoq. Taamatuttaaq suliffeqarfik inuusuttunik Nordjobbimeersunik siornatuulli suliartortitseqqinniarpoq.
- Nunanit allaneersunik suliartortitsisariaqarnitta takutiinnarpaa tunisassiorfinni suliassarpassuaqartoq. Ulapaarfimmi sulisinnaasut amerlanerujussuit pisariaqartippavut, aallartiffeqartariaqarattali taamatuttaaq isumaqaratta amerlavallaartunik suliartortitsineq pissusissamisuunngitsoq Kinamiunik 40-ngajannik suliartortitsinissarput aalajangerparput. Ulapaarfik qaangiuppat allatigut qanoq iliornissarput aalajangissavarput, Søren Olsen Damgaard oqarpoq.
Kinamiut tunisassiorfimmi sulisutut Royal Greenlandimut suliartortussat illunilu Royal Greenlandimit pigineqartuni inisimasussat 38-usut Kalaallit Nunaanni najugaqarnissamut sulinissamullu allagartatik Udlændingestyrelsenimut ukiut tamaasa nutartertikkiartortassavaat.
Royal Greenland Maniitsumi Uummannamilu innuttaasunik apriilip naalernerani ataatsimiisitsissaaq, ataatsimiisitsinernilu Kinamiunik tunisassiorfimmut suliartortitsinermut tunngavigineqartut ilisimatitsissutigineqassapput.
- Kinamiut suliartortitassatta tikilluaqqunissaat qilanaaraarput. Sulisussaaleqisarnerpummi pakkersimaarusullugu suliartortinniarpavut, illoqarfinni pingasuni pineqartuni innuttaasut suleqatissavut tikilluaqqulluarumaaraat neriuutigalutigulu qularinngilarput, Søren Olsen Damgaard oqarpoq.
Asseq
