- Tunisassiagut MSC-mik ilisarnaaqqusikkat pisisartunit pilerigineqartorujussuupput, taakkulu piumasaat aallaavigalugit tunisassiornerput maani ingerlattarparput. Assersuutigisinnaavara pujuugaliassat qanoq tunisassiarineqassanersut pisisartut namminneerlutik piumasaraat. Tamaammat tunisassiorneq pisisartut piumasaqaataat aallaavigalugit allanngorartumik ingerlasarpoq, Qasigiannguani tunisassiorfimmi ingerlatsisoq Hans Grønvold oqarpoq.

Pisisartut piumasaat malillugu qaleralinnik anginerusunik tunisassiorneq massakkut ingerlanneqarallarpoq.

- Qalerallit tisallugit, amii atatiinnarlugit, oqimaassutsinut aalajangersimasunut aggorlugit angissutsillu aalajangersimaqqissaartut atorlugit pujuugassanik tunisassiorneq ingerlapparput, Hans Grønvold oqarpoq.

Pisisartut piumasaat malillugu nerpik amilik grammip aalajangersimasup iluani oqimaassuseqartoq pujuugassiassatut pisiarerusunneqartartoq ingerlatsisup oqaatigaa. Pujuugaliassatut tunisassiat tonsit marluk angunissaasa tungaannut ingerlanneqassapput.

Qalerallit mikinerusut

MSC-mik ilisarnaaqqusikkanik tunisassiorneq aamma allanngorarsinnaasoq Royal Greenlandip Qasigiannguani tunisassiorfiata ingerlatsisuata oqaatigaa. Qalerallit anginerusut tunisassiarineqarneri naammassineqarpata mikinerusut tulliullugit aamma tunisassiarineqassapput.

- Pujuugassanik tunisassioreerutta qalerallit mikinerusut aamma MSC-mik ilisarnaaqqusikkat tulliullugit tunisassiarilissavagut. Taakku tisallugit ameerlugillu tunisassiarissavagut, Hans Grønvold oqarpoq.

Qalerallit nungusaataanngitsumik pisat tunisassiarineqartussat 600 tonsiussapput, taakkulu Royal Greenlandip Qasigiannguani tunisassiorfiani sulisunit 100-t missaanniittunit tunisassiarineqassapput.

Allattoq: Marie Kuitse Kristensen, mkri@royalgreenland.com

Asseq: Hans Grønvold

Asseq

 
 

Royal Greenland aperiguk

i
Write the text from the image