- Qaleralinnik MSC-mit akuerisanik tunisassiorneq ullummikkut marlunngornermi aallartipparput. MSC-ip piumasaqaataanik naapertuisussaatitaagatta tunisassiorfimmi teknikerit, pitsaassusilerinermik suliallit, quersuarmi sulisut, tunisassiorfimmi sulisut kiisalu allaffimmiut tunisassiorfimmi suliassanik, meqqinik, poortuutissanik qaleralinnillu MSC-mit akuerisanik nalunaarsuisalernissamut piareersarlutik ulappupput, Royal Greenlandip Maniitsumi tunisassiorfiani ingerlatsisoq Susanne Marie Knudsen oqarpoq, nangipporlu:

- Taamatuttaaq tunisassiorfimmi sulisut MSC-mit akuerisanik tunisassiorneq pillugu pikkorissarput. Sulisut MSC-mit akuerisanik tunisassiornermik suliaqartartussat tamarmik MSC-mit akuerisanik tunisassiorneq pillugu pikkorissarsimanissaat piumasaqaataavoq. Pikkorissarsimanngikkunik MSC-mit akuerisanik tunisassiorfimmut isersinnaanngillat. Taamaammat MSC-mit akuerisanik tunisassiornermut piumasaqaatit sulisunut sapaatip-akunnerata naanerani ilisimatitsissutigaavut.

Kalaallit Nunaanni suliffeqarfiit aalisarnermik tunisassiornermillu aallussallit kattuffiat Sustainable Fisheries Greenland qaammatini 14-ini sulissuteqariillartorlu avataani qaleralittat MSC-mit 2017-imi maajip 23-ani akuerineqarput.

Marsi 2018-ip tungaanut suliassaqartitsineq

Saarulliit suli uumasut mamartuliarilluinnarlugit tassa Nutaaq Codiliaralugit Royal Greenlandip Maniitsumi tunisassiorfiani sapaatip-akunnera 48 ilanngullugu tunisassiarineqarput. Qalerallit MSC-mit akuerisat Royal Greenlandip Maniitsumi tunisassiorfiani ullumikkut marlunngornermiit 2018-imi marsip naanerata tungaanut tunisassiarineqassapput. Tassa qalerallit MSC-mit akuerisat nerpiinik tunisassiorneq tunisassiorfimmi ingerlanneqassaaq.

- Royal Greenlandip kilisaataatai marluk; Sisimiut aamma Tuugaalik avataani qaleralittanik katillugit 1000 tonsiusussanik tunisassiorfimmut pilersuisuussapput. Qaleralittat 1000 tonsiusussat sulisut 120-t 2018-imi marsip tungaanut suliassaqartinneqarnissaannut qulakkeerisuussapput, tamatuma kingorna saarullinnik suli uumasunik tunisassiorneq aallarteqqissavarput, Susanne Marie Knudsen oqarpoq.

Qaleralinnik tunisassiornerput aatsaat januaari 2018-imi aallartissasoq pilersaarutaagaluarpoq, tunisassiorfimmi ingerlatsisoq nassuiaavoq.

- Saarulliit suli uumasut tunineqartartut decembarip aallartinneraniilli annikilliartuinnarmata aamma sulisut juullernissaanut aningaasarsiornissaat qulakkeerumallugu aalajangerpugut qaleralinnik tunisassiorneq sapaatip-akunnera 50-imi aallartissagipput, Susanne Marie Knudsen oqarpoq.

Aalisartut Maniitsumeersut saarullinnik tunisassiorfimmi nalinginnaasumik tunisassiarineqartussanik tunisinissaminnut periarfissaqartinneqarnerat atuutiinnassaaq.

Allattoq: Inga Egede, ineg@royalgreenland.com

Assit: Susanne Marie Knudsen

Asseq

 
 

Royal Greenland aperiguk

i
Write the text from the image