- Tunisassiorfimmi sulisut juullilernerani aliikkusersuinertalimmik naggataagullu qittannertalimmik decemberip qulingiluaani nereqatigiipput, Royal Greenlandip Qasigiannguani tunisassiorfiani ingerlatsisoq Hans Grønvold oqarpoq, nangipporlu:

- Unnuk assigiinngitsunik sammisaqartitsiviulluni nereqatigiiffiusoq peqataasullu nerilluataarfigisaat nuannersumik ingerlavoq.

Qasigiannguani taalliortut erinniortullu nuimanerit ilaat Mads Grønvold kiisalu nipilersullammassuaq Ole Kristiansen nipilersoqataalu appisimaartoralugit unnuk naggaserneqarpoq.

Meeqqat qiortaatinneqarput

Taamatuttaaq sulisut meerartallit Royal Greenlandip tunisassiorfiani nerisarfimmi nuannivissumik arfininngormat decemberip 16-iani qiortaaqatigiisinneqarput, Hans Grønvold oqarpoq.

- Sulisut meerartaat qiortaatinneqarmata orpiup qullii isersimasuni nukarlerpaamit ikinneqarput, ikitsisorlu poortukkamik tunineqarpoq. Tamatuma kingorna juullip inua aamma Nanoq iserput, taakku ATV-it atorlugit qamutinik kalitaqarlutik takkummata alutornavissorpoq. Nanoq aquttuuvoq, juullillu inua qamutini ilaasuulluni iserami ikiortinilu meeqqanut puussiaaqqanik agguaapput. Ualeq nuannersumik ataatsimoorfigaarput. Kaffi, tii, safti, imeq, æbleskivit kiisalu kaageeqqat juullisunnitsut iggavimmi sulisunit nammineq iffiukkat sassaalliutigineqarput, Hans Grønvold oqarpoq, imalu nangippoq:

- Juulleriartornerani taama aaqqissuisarneq assut nuannersumik ingerlanneqartarpoq qilanaarineqartarlunilu.

Hans Grønvoldip oqaatigaa, Royal Greenlandip Qasigiannguani tunisassiorfiani sulisut Royal Greenlandip juullinnginnerani ullormi suliffiusumi kingullermi tunniuttagaanik puuarannatsinneqassasut.

- Puuaaqqat sinneqassappata kommunemi isumaginnittoqarfik suleqatigalugu nunaqqatitsinnut pissakitsunut kingumut tunissuteqassaagut, Hans Grønvold oqarpoq.

Qiortaaqatigiinnermi assit ataani takuneqarsinnaapput.

Foto: Hans Grønvold

Asseq

 
 

Royal Greenland aperiguk

i
Write the text from the image