Siorna aqutsiveqarfimmi Upernavimmi saattuanik pisaassiissutit tunniunneqartut 200 tonsiupput, taakkunanngalu tonsi ataasiinnaq pisarineqarsimavoq. Ukioq mannali pisat annertuserujussuarsimapput pissaassiissutigineqartunit 225 tonsiusunit 183 tonsit pisarineqarsimammata.

- Aggustip qeqqata missani saattuarniarluni aallartikkama, novembari naanngitsoq 70 tonsit missaaniittut saattuat pisarereerpakka tamannalu assut iluarisimaaqaara, saattuarniummik Jaaku-Malimmik piginnittoq, Jørgen Peter Jensen taama oqarpoq.

Ukioq manna saattuanik pisassiissutit aqutsiveqarfimmi Upernavimmi pisassiissutigineqartut 225 tonsiusunit 81 procentii pisarineqarput. Pisarineqarsimasunillu 70 tonsit missaanniittut saattuarniummit Jaaku-Malimmit Qeqertarsuarmi Royal Greenlandip tunisassiorfianut tunineqarput.

Saattuarniummik Jaaku-Malimmik aalisariutillip tamanna iluarisimmaarneqarpoq.

- Jaaku-Malik angallat 50 fodsit missaanik angissusillip pisaarinnginnerani Miilumik atilik 42 fodsimik angissusilik pigereerpara. Ukioq manna saattuarniarnera iluatsilluarmat inuttassaqassaguma taanna aapparalugu angallatit marluk atorlugit aappaagu saattuarniarnissara pilersaarutigaara, aalisariummi piginnittoq, Jørgen Peter Jensen oqarpoq.

saattuat kusanarput

Aqutsiveqarfik Upernavimmi saattuat Jaaku-Malimmit pisarineqartut Qeqertarsuarmi Royal Greenlandip tunisassiorfiani tunineqartarput. Qeqertarsuarmi Royal Greenlandip tunisassiorfiani ingerlatsisuugallartup Mona Lisa Isaksenip Upernaviup eqqaani Qeqertarsuullu eqqaani pisaat assigiinngissutaat maluginiarsimavaa:

- Upernaviup eqqaani saattuat pisat nerpittunerusarput, anginerullutik isikkumikkullu kusanarnerullutik. Qeqertarsuup eqqaani saattuat pisarineqartut pitsaassutsimikkut appasinnerusarput, Mona Lisa Isaksen oqarpoq.

Nunata sineriaani saattuarniarnermi aqutsiveqarfiit tamakkerlugit ukioq manna saattuanik 2.900 tonsik pisassiissutigineqarput, taakkunannga 2.320 tonsit novembari naanngitsoq pisarineqarput. 2.320 tonsi pisarineqartunit 1.378 tonsit Royal Greenlandip tunisassiorfiinut tunineqarput. Siorna 3.150 tonsit pisassiissutigineqarmata 2.190 tonsit pisarineqarsimapput.

Saattuarniarnermi aqutsiveqarfimmi Nuuk – Paamiuni pisassiissutigineqartut 1.200 tonsiusut tamarmik pisarineqarmata ullumi decembarip aallaqqaataani saattuarniarnerat unitsinneqartoq Aalisarnermut Piniarnermut Naalakkersuisoqarfimmit nalunaarutigineqarpoq.

Allattoq: Marie Kuitse Kristensen, mkri@royalgreenland.com

Foto: Royal Greenland A/S

Asseq

 
 

Royal Greenland aperiguk

i
Write the text from the image