Uummannami nunaqarfiinilu tunisineq aallarteqqippoq
Ullumi sisamanngorneq junip 22-iani 2017 Uummannami Royal Greenlandip tunisassiorfianut –Uummannallu sulluani nunaqarfinni Ukkusissani, Saattuni Ikerasannilu Royal Greenlandip tunitsiviinut qaleralinnik tunisineq aallarteqqippoq
Taama paasissutissiivoq Royal Greenlandimi ingerlatsinermut pisortaq Niels Ole Møller. Niels Ole Møllerilli erseqqissaatigaa Nuugaatsiami tassaarsuaqarnerata malitsigisaanik taamatullu Uummannap sulluani tassaarsuaqaqqissinnaaneranik aarlerisaarisoqarnerata nassatarisaanik Royal Greenland sulisoqarnikkut eqqugaamma, tunitsivinni sumiiffinni pineqartuni naammassisinnaasat aallaavigalugit pisiortorneq ingerlanneqassammat.
- Erseqqissaatigissavara tassaarsuaqarnerata malitsigisaanik sulisoqarniarnikkut eqqugaanerput pissutigalugu sumiiffinni ataasiakkaani ullormut naammassisinnaasat aallaavigalugit pisanik nutaanik pisiortorneq ingerlanneqassammat, Niels Ole Møller oqarpoq.
Sisamanngorneq 22 juni aallarnerfigalugu qalerallit ima annertussuseqartut sumiiffinni ukunani pisiortorneqarsinnaapput:
Ukkusissat: 2,5 tons
Saattut: 3 tons
Ikerasak: 6 tons
Uummannaq: 20 tons
Tamaatuttaaq Niels Ole Møllerip paasissutissiissutigaa sumiiffinni ataasiakkaani sulisut uterarnerat ilutigalugu ullormut pisiarisartakkat amerliartussammata.
Tunitsiviit aallarteqqinnerat sumiiffinni ataasiakkaani allagartaliinikkut nalunaarutigineqarpoq.
Royal Greenlandip sillimaniarnermut oqartussaasunut attaveqartuarnermigut sumiiffimmi pisut malinnaavigai.
Uummannap sulluani pingaartumillu Nuugaatsiami junip 17-iani pisimasoq ilungersunartoq pissutigalugu tunisassiorfiillu arlallit sunnerneqarsimanerat pissutigalugu juunip 18-iani Royal Greenlandi aalajangerneqarpoq, Royal Greenlandip Uummannap pigisaani tunisassiorfiinut tunisineq unitsikkallarneqassasoq.
Allattoq: Inga Egede, ineg@royalgreenland.com
Asseq: RG
Asseq
