- Ukioq manna novemberip 19-iat tikillugu saarullit nerpii 378 tonsit tunisassiaraavut, siorna ukioq naallugu 298 tonsit tunisassiarisimallutigik, Kangaatsiami Royal Greenlandip tunisassiorfiani ingerlatsisoq Abia Thorsteinsen oqarpoq.

Kangaatsiami Royal Greenlandip tunisassiorfiani aalisakkanik qerititanik siornatigut tunisassiorne ingerlanneqartaraluartoq 2015-imi maajimi masikinamik tisassummik ikkussuisoqareerneratigut saarullinnik tisaanik aammalu saarullinnik qerititanik tunisassiorneq ukiuni kingulliunerusuni annertuisartuinnavippoq.

- 2013-ip naalernerani Kangaatsimut pininniit saarullinnik tunisineq annertusiartuinnavinnikuuvoq. 2013-imi saarulliit 400 tonist tunineqarput 2016-imili tunineqartut 1.900 tonsiupput, Abia Thorsteinsen oqarpoq.

Naammagisimaarinnippoq

Naak ukioq manna saarullinnik tunisineq annikilleriaraluartoq annertunerusunik tisaanik tunisassiulernertik tunisassiorfimmi ingerlatsisup naammagisimaarpaa.

- Ulapaarfiup nalaani majimiit juli tikillugu sulisut holdt marluutillugit tunisassiorneq misilikkaluarparput, sulisunilli amigaateqartarneq pissutigalugu kingorna sulisut sulilluartut sulisoralugit holdi ataasiinnanngortipparput, tunisassiorfimmi ingerlatsisoq oqarpoq, nangipporlu: - - Soorngunami sulisut holdet marluk sulisoralugit tunisassiornerup ingerlaannarsnissaa kissaatiginerugaluaqaara, sulisunilli amigaateqartuarneq pissutigalugu holdi ataasiinnanngortipparput, taamaakkaluartorli ukioq manna annertunerusunik saarulliit nerpiinik tunisassiornerput naammagisimaarpara. Saarulliit nerpiinik tunisassiornermi sulisut sungiussinerat pissutigalugu tamanna pisinnaasimavoq, Abia Thorsteinsen oqarpoq.

Kangaatsiami sulisunik amigaateqartarneq Royal Greenlandip aaqqiiffiginiaraa Abia Thorsteinsen oqarpoq.

- Kangaatsiami Royal Greenland pingasunik illuuteqarpoq, pingasunik sinittarfilinnik. Taakku avataaniit suliartortut inigissavaat, Abia Thorsteinsen oqarpoq.

Kangaatsiami Royal Greenlandip tunisassiorfia maannakkorpiaq 50-it missaannik sulisoqarpoq.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image