Royal Greenlandimi raajat qalipaannik qajuusiarineqartut tamarmik Norgemut tunineqartarput. Taakku ilaatigut kapisilinnut tukertitsivimmiititanut nerukkaatitut Norgemi atorneqartartartut Ilulissani Raajat qaleruaannik qajuusialerinermi ingerlatsisuugallartoq, Frank Nicolaisen oqaluttuarpoq.

- Raajat Royal Greenlandimut tunineqartut qalipaannik qajuusiat Norgemi tunisassiorfiit ilaanni piumaneqaqalutik pisiariumaneqartarput. 1980-ikkut ingerlaneranniit ulloq manna tikillugu tunisassiat Norgimiunnaq tunisarpavut. Siunissarli ungasinnerusoq eqqarsaatigalugu raajat qalipaannik qajuusiat nunanut allanut aamma tunisalernissaat takorluugaraarput Frank Nicolaisen oqarpoq, taakkulu sumut atorneqartaneri ilaatigut ima oqaluttuaralugu:

- Raajat qalipaannik qajuusiat ilaatigut Norgemiut kapilisinnik tukertitsivinniitsitani nerukkaatitut atortarpaat, tassagooq kapisillit nerpii aappalunnerulerniassammata, Frank Nicolaisen oqarpoq.

Qajuusiarineqarneri

Ilulissani Royal Greenlandip tunisassiorfiani ulluni makkunani raajat qalipaannik qajuusiorneq ingerlalluarpoq, raajanik tulaassuinerit ingerlalluarmata.

Assersuutigalugu raajat 68 tonsit missaaniittut tunisassiorfimmut tunineqarangata nioqqutissiaralugit naammassisat 20 tonsit missaanniittarput, qalipat sinneruttut 40 tonsit missaanniittut qajuusiarineqartartut Frank Nicolaisen nassuiaavoq.

- Raajat tunisassiorfimmut tunineqartut qalipaajarneqaraangata qalipai kuuffimmut nakkartinneqartut toqqaannarlutik raajat qalipaannik qajuusiorfimmut ingerlasarput. Assersuutigalugu raajat 40 tonsit qalipaat qajuusianngorlutik naammassisut 3 tonsit missaanniissapput, Frank Nicolaisen oqarpoq.

Raajat qalipai qajuusiorfimmut apuunneqaraangamik tunisassiarineqarlutik naammassinissaat tikillugu maskiinanik suliarineqartarput.

- Imertaa nakkartinneqariarluni qalipat sinnerukkaangata maskiinarsuup siggorlugit aallartittarpai, siggorneqareeraangatalu maskiinamut tullermut ingerlasarput tassani siggoqqillutik. Siggoreeraangamik uutiterivimmik taasartakkatsinnik panerserneqartarput kissassuseq aalajangersimasoq atorlugu. Naggataatigut sequtserivikkoortinneqartarput millimeterinik ataatsinik mikinerusunngorlutik sequtsillugit, taava tassa tunisassiaq naammassisarpoq poortorneqarnissamullu puiareerluni. Maskiinarsuup qajuusiat poortuivimmi poorsuarnut issorartarpai poorsuarlu ataaseq tonsimik ataatsimik imaqarsinnaavoq, Frank Nicolaisen oqarpoq.

Raajat qalipaannik qajuusiorneq ingerlaavartumik ingerlatillugu tonsi ataaseq akunnerit sisamat ingerlaneranni naammassineqarsinnaasartoq ingerlatsisuugallartoq nassuiaavoq.

Nunatsinni Royal Greenlandip tunisassiorfiini Ilulissani Sisimiunilu raajanik tunisassiorput. Siunissami Sisimiuni raajat qalipaannik qajuusiortalernissaq aamma soqutigineqarlunilu amaaffigineqartoq Sisimiuni tunisassiorfimmi ingerlatisoq paasissutissiivoq.

Allattoq: Marie Kuitse Kristensen, mkri@royalgreenland.com

Assit: Frank Nicolaisen

Asseq

 
 

Royal Greenland aperiguk

i
Write the text from the image