Aviaaja Odgaard Lynge AFS-erluni oqaatsinik pikkorissarluni Italiami najugaqarpoq. Anaanarsiani Arianna qatanngutisiani Giada aanarsianilu Lia Portocusop sissaani illorujussuarmi najoqatigai.

Aviaja Odgaard Lynge Italiami qeqertami Carlofortemi ilinniarnertuunngorniarfimmi Istituto Nauticomi oqaatsinik assigiinngitsunik sisamanik ilinniarluni atuarpoq. Aviaajap atuartut allat 500-t atuarfimmini atuaqatigai.

- Ilinniarnertuunngorniarfimmi tyskit, franskit, italiamut tuluillu oqaasii ilinniarpakka. Taakku saniatigut kisitsineq, eqaarsaaneq fysikkilu tiimeqarfigisarlugit. Atuartut katilluta 500-t missaanniippugut uangalu nunanit allaninngaaneersortatuaallunga Kalaallit Nunaaninngaaneersuuvunga sinneri tamarmik Italiameersuupput, Aviaja Odgaar Lynge oqarpoq.

Aviaaja Portocusomiit atuariartoraangami minutsit 40-t atorlugit ikaartaammut ilaalluni qeqertamut allamut atuariartortarpoq.

Aviaaja Odgaard Lyngep AFS-eqatini Italiamiittut allat peqatigalugit sapaatip akunneranut marloriarlutik naapittarput. Naapikkaangamik Italiamiut oqaasiinik ilinniartarput.

Italiamiut ussersornikkaaqaat

Aviaaja Odgaard Lyngep Italiamut tikeqqaarami Italiamiut pissusaannik maluginiakkami ilaat ima oqaluttuaraa:

- Tikeqqaarama maluginiakkama ilagaat inuit aqqusinermi nilliallutik imminnut oqaluuttartut. Paatsuungassutigilaartanikuugaluarpara sooq taama oqaluuttarnersut, aallaqqaammut eqqarsartaraluarpunga oqqannersut imaluunniit kamaannersut. Sunaaffa ileqqorigaat kamaatinngikkaluarlutik oqqatinngikkaluarlutik nipitoorsuarmik imminnut oqaluuttarneq, taavalu talitik atorlugit ussersungaatsiartarlutik, Aviaaja Odgaard Lynge oqarpoq.

Italiamiut nipituumik oqalunnikkaaginnaratik aamma nerisassiornermik soqutigisaqarlutillu nerisassiortaqisut Aviaaja Odgaard Lynge oqaluttuarpoq.

- Oqaatigerusuppara septembarimiit maaniileramali ulloq manna tikillugu kiilunik pingasunik oqimaallinikuuvunga. Anaanarsiama ullormut marloriarluni kissartunik mamarluinnartunik nerisassiuuttarpaatigut, Aviaaja Odgaard Lynge oqarpoq.

Isumaqatigiissutit

Aviaaja Odgaard Lynge AFS-erluni angalanermini angerlarsilinnginnissani eqqarsaatigalugu angajoqqaanilu isumaqatigiinnikuupput sapaatip akunneri pingasut qaangiukkaangata angajoqqaani oqarasuaatikkut isigalugit oqaloqatigisassagallugit, tamannalu inuttaata naammagisimaarpaa.

- Angajoqqaakka tusaraangakkit nuannertaqaaq, sivisulaamik tusarsimanagit kipillunga oqaluttuassaneqqissimallungalu oqaloqatigisarakkit. Malunnarpoq tusakulanagit angerlarsernannginnerusoq, Aviaaja Odgaard Lynge oqarpoq.

Aviaaja Odgaard Lynge qaammatini qulini oqaatsinik pikkorissarluni Italiamiittussaavoq, taassumalu pilersaarutigaa naammassiguni nunatsinni imaluunniit qallunaat nunaanni ilinniarnertuunngorniarnissani.

Aviaaja Odgaard Lyngep angalanera Royal Greenlandimiit tapiiffigineqarpoq.

Allattoq: Marie Kuitse Kristensen, mkri@royalgreenland.com

Assit: Aviaaja Odgaard Lynge

Asseq

 
 

Royal Greenland aperiguk

i
Write the text from the image