Containerinik imaqanngitsunik palletsinillu pilersuilluarsinnaannginneq Royal Greenlandip Kalaallit Nunaanni tunisassiorfiinut 38-usunut tamarluinnangajannut aammalu kilisaatit usingiarnissaannut akimmisaartitsipput.

Assersuutigalugu Maniitsumi tunisassiorfik maanna containerinik imaqanngitsunik pilersorniarneqarnerup tungaatigut sivitsulersumi ajornartorsiorfiusimavoq, allaat tunisassiorfiup qerisuusiviata ulikkaartoorneranik kinguneqarsimalerluni. Qerititsivillu ulikkaaqqatillugu tunisassiorneq ingerlasinnaanngilaq.

Maniitsumi tunisassiorfimmi ingerlatsisup ulluinnarni tunisassiornerup sukataarfiusartup saniatigut containerinik imaqanngitsunik naammattunik pissarsiniartarneq nukippassuarnik atuiffigisarpaa.

- RAL-ip containerinik pilersuiniarneragut akimmisaartinneqarsimaqaagut. Naak containerinik siumungaatsiaq pilersaarusioreerluta inniminniisaraluarluta tunisassiorfiup matunissaanut sulisunillu angerlatitsinissamut aarlerinartorsiortinneqartuarpugut, tamannalu suliffeqarfimmut, sulisunut aammalu aalisartunut toqqissisimananngilaq, Susanne Marie Knudsen Royal Greenlandip Maniitsumi tunisassiorfiani ingerlatsisoq oqarpoq nangillunilu:

- Allaalluunniit aalisakkat sikulersukkat piumaneqaqisut tunisassiarisinnaajunnaarpagut, tassa umiarsuit tikittussat qanoq isiallannerinnakkut allanngortinneqartartut pilersaarusiornissatsinnut periarfissiisinnaanngimmata.

RAL-imik qanimut suleqateqarneq

Naak Royal Arctic Linep aammalu Royal Greenlandip assartugalerinermi immikkoortortaat qanimut suleqatigiilluinnaraluartut ajornartorsiutit qaangeruminaapput, aamma pakasarneqarumanani tunisassiorfiit containerinik palletsinillu amerlanaaraluni eqqanaarsartoqartaraluartorluunniit. Assersuutigalugu Upernaviup pigisaani Saqqamilu tunisassiorfiit palletsissaaleqinikkut eqqugaasorujussuupput, Saqqami tunisassiorfik palletsissaminik qaammatini marlunni utaqqisimalluni.

Taamatuttaaq imaani ingerlatsineq RAL-ip aarlerinartumik kiffartuussineranit eqqugaavoq. Royal Greenlandip kilisaataataasa ilaat Akamalik Sisimiuni ulluni marlunni uninngaannartariaqarpoq, uffa usingiarnissaa siornali inniminnerneqarsimagaluartoq.

- Usingiarsinnaajunnaarnerput ullormik ataatsimik sioqqutsilluni RAL-imit nalunaarutigineqarnissaa siumut ilisimasimasuugutsigu inuttanik Upernavimmi taarsiiniarsimasinnaagaluarpugut taavanilu aalisarnerput nangiinnarlugu. Ilungersunaqaaq, pilersaarusiornikkut aalisarnikkulu RAL-ip pilersaarusiornerlunneranit akornusersorneqarnitsigut Royal Greenland iluanaarutissaraluaminik annaasaqarpoq, Royal Greenlandip kilisaatileriffiani ingerlatsisoq Jens Bisgaard oqarpoq.

Akimmisaaruterpassuilluunniit eqqaaginnarlugit avannaani sikuppat pilersuinerup usingiarsinnaanerullu tungaatigut Royal Greenlandi ernumaammisaanngitsuunngilaq.

Allattoq: Káte Hansen, kaha@royalgreenland.com

Asseq: John David Eriksen

Asseq

 
 

Royal Greenland aperiguk

i
Write the text from the image