Paamiuni tunisassiorfiup saarullinnut maskiinamik panertitsivittaarneragut pisisartut saarullinnik panertunik ukioq kaajallallugu pisisinnaangussasut Royal Greenlandimi tunisassiornermi siunnersorti Jan Jørgensen qilanaartuusiivoq.

- Pisisartut juullinnginnerani saarullinnik panertunik nutaanik pisisinnaanngornissaat qilanaartuutigisinnaavara. Saarullinnik panertitsivik ukiup qanoq ilinera apeqqutaatinnagu panersiisinnaasoq Paamiuni tunisassiorfimmi misiligarneqaleruttorpoq, Jan Jørgensen oqarpoq.

Nunatta sineriaani pisiniarfinni angisuuni Kalaallit Nunaanni Brugsenini, Pisiffinni Pilersuisunilu Royal Greenlandip tunisassiaanik kalaaliminernik assigiinngitsunik pisiassaqartarnera nalinginnaavoq. Tamatigulli saarulliit panertut pisiarineqarsinnaaneq ajorput, nunguutsisoqartarmat. Ukiup qanoq ilinera aallaavigalugu sumiiffiit ilaanni panertitsinissaq ajornakusoorsinnaasarpoq, assersuutigalugu saarulliit issimi parnertitat aasakkut tunisassiarineqarsinnaaneq ajorput. Maannali Paamiuni Royal Greenlandip tunisassiorfiani maskiinamik nutaarsuarmik pisaarneratigut tamanna pinngitsoorsinnaalerpoq.

- Ukioq kaajallallugu panertunik tunisassiorsinnaalerneq susassaqartunut tamanut iluaqutissartaqarpoq. Aalisartut saarullinnik panertuliassanik ataavartumik tunisisinnaassaapput, tunisassiorfimmi sulisut suliassaqassapput pisisartullu mamarilluinnakkaminnik ukioq kaajallallugu saarullinnik panertunik pisiniarsinnaalissapput. Soorunami aamma Royal Greenlandip aningaasanik kaaviiaartitsineranut iluaqutaassaaq, Paamiuni Royal Greenlandip tunisassiorfiani ingerlatsisoq Ilannguaq Abrahamsen oqarpoq.

Saarulliit maskiinami panertitat juullinngitsoq pisiniarfinni pisiarineqarsinnaaleriissapput.

Allattoq: Marie Kuitse Kristensen, mkri@royalgreenland.com

Assit: Jan Jørgensen

Asseq

 
 

Royal Greenland aperiguk

i
Write the text from the image