- Pikkorissartitsinerup siunertaraa, sullivimmi inuit ulorianartorsiunnginnissaat atortullu aserunnginnissaat qulakkeerumallugu Royal Greenlandip tunisassiorfiini tunitsiviinilu sulisut kivitassat oqimaatsut assartornissaannut kraninik isumannaatsumik aarlerinanngitsumillu ingerlatsisinnaanngornissaat. Taamatuttaaq pikkorissartut kraninik aserfallatsaaliunermut aamma najukkaminni sullivimmi kraninik aserfallatsaaliuinermut akisussaasuunermut ilinniartinneqarput, pikkorissartitsinermi aqutsisoq ilinniaqqiffimmillu EUC-imi Holbækimiittumi ilinniartitsisuusoq Roland Olsen - Royal Greenlandimi sulisunik kranernermik ukiuni qulini kingullerni pikkorissartitsisuusartoq - oqarpoq.

Royal Greenlandip Niaqornaarsummi, Attumi Ikerasaarsummilu tunitsiviini sulisut aamma Kangaatsiami, Upernavimmi Sisimiunilu tunisassiorfiini sulisut kranernermik kranilerinermillu pikkorissartitsinermi peqataapput.

Sullivimmi isumannaallisaanermut akisussaasoq

Royal Greenlandip Kangaatsiami tunisassiorfiani ingerlatsisoq Abia Thorsteinsen – pikkorissartitsinermi aamma peqataasoq - oqarpoq, aqutsisutut sullivimmilu isumannaallisaanermut akisussaasutut sulinermini kraninik atuisinnaanissaa ingerlatsisinnaanissaalu pingaaruteqartoq.

- Isumannaallisaaneq eqqarsaatigalugu Kangaatsiami tunisassiorfimmi aamma Niaqornaarsummi, Attumi Ikerasaarsummilu tunitsivinni ingerlatsisutut kranit atuuffiinik ilisimasaqarnissara taakkuninngalu atuisinnaanissara pingaartuusoraara. Kranit angissusaat apeqqutaallutik atuuffii assigiinngitsuusartut pikkorissarnitsinni paasivarput. Sulisut isumannaatsunik avatangiiseqartitaanissaannut kranillu aserfallatsaaliorneqartarnissaannut akisussaasuugama aamma Kangaatsiami kranit nunaqarfinnilu tunitsivinni kranit angissusaat atuuffiilu assigiinngimmata atuuffii pisinnaasaallu assigiinngitsut pillugit ilisimasaqarnissara pingaartuusoraara, Abia Thorsteinsen oqarpoq.

Nammineq kranersinnaanngorpoq

30-nik ukiullip Dorthia Esrassen Lundbladip Sisimiuneersup oqaatigaa, nammineq kranersinnaanngornini nuannaarutigalugu.

- Kranit atuuffiilu pillugit ilikkakkakka amerlapput. Assersuutigalugu anorip sammivia naapertorlugu oqimaatsunik kivitsineq pillugu ilikkagaqarpunga. Taamatuttaaq sulisumit kraninik ingerlatsisinnaanermut uppernarsaammik allagartalimmit ikiorneqanngikkaluarlunga nammineq kranersinnaanngornera iluaqutigilluassaqaara. Kranernermik pikkorissaqataanera suleqatikkalu sulinitsinni isumannaassuseqarnissatsinnut aamma pingaaruteqarpoq, Dorthia Esrassen Lundblad oqarpoq.

Pikkorissartut Hotel Maniitsumi ullaakkut atuagarsortarsimapput, Royal Greenlandillu Maniitsumi tunisassiorfiani ualikkut misileraasarsimallutik.

Allattoq: Inga Egede, ineg@royalgreenland.com

Assit: Marie Kuitse Kristensen

Asseq

 
 

Royal Greenland aperiguk

i
Write the text from the image